"Улс төр ба Үндсэн хууль" сэдвээр УИХ-ын гишүүн Х.Тэмүүжин өнөөдөр  Хэвлэлийн хүрээлэнд сэтгүүлчидтэй уулзаж, илтгэл тавилаа. Уулзалтаар Монголын Төрийн тогтолцоонд үүссэн институцийн хямрал, Үндсэн хуулийн хэрэгжилтийн доголдол, улс төрийн соёлын доройтлыг хөндөв.

УИХ-ын даргын эрх мэдлийг өнөөгийн Монголын төрийн тогтолцоонд гаж буруу ойлгож байгааг тэрээр шүүмжилжээ. УИХ-ын гишүүн Х.Тэмүүжин хэлэхдээ,  олон нийт болон хэвлэлийнхний ярианд гардаг “Төрийн гурван өндөрлөг” гэх хэллэг ч буруу. Мөн "УИХ-ын дарга бол дарга биш, хурал удирддаг, төвийг сахисан хүн байх ёстой.

Гэвч манайд УИХ-ын даргыг фракц, намын удирдагч мэт ойлгодог нь парламентын ардчиллыг мушгин гуйвуулж байна гэлээ.

Холбооны Бүгд Найрамдах Герман улсын парламентын спикер нам дотроо карьер хөөх, намын бүлгийн хуралд суух эрхгүй байдаг аж. Иймд тэрээр Улсын Их Хурлын тухай хуульд өөрчлөлт оруулах хуулийн төсөл өргөн мэдүүлсэн байна.

"Улс төрийн эрүүл өрсөлдөөн гэхээс илүү албан тушаалын зодоон сүүлийн сар гаран үргэлжилсэн. Энэ үйл явцад татагдаж ороогүй төрийн байгууллага алга.

Энэ зодоон дунд хамгийн их хохирол амссан институт нь парламент буюу УИХ байсан" хэмээн Х.Тэмүүжин гишүүн онцоллоо.

Тэрбээр парламентыг улс орны бүрэн эрхт байдлыг илэрхийлдэг гол институт гэж тодорхойлж, "Парламент гэдэг чинь олонх, цөөнхөөрөө хоорондоо мэтгэлцэж, бодлогоо уралдуулж, бас ойлголцож энэ улс орныг авч явдаг.

Тийм учраас парламентын спикер буюу УИХ-ын даргыг нам бус байх хуулийн төслийг өргөн мэдүүлсэн гэв.

Монголын төрийн тогтолцооны гол гажуудлын эх үүсвэр нь хууль тогтоох болон хянан шалгах институцуудын хараат бус байдал алдагдаж, улс төрийн зорилго, фракцын сонирхолд үйлчилдэг болсон явдал.

"Үндсэн хуулийн Цэцийн бие даасан байдал алдагдсан бөгөөд Үндсэн хуулийн Цэц “халаасны байгууллага” болсныг ч онцлов.

"Улс төрчдийн гол зарчим бол үлдээх өв бодит legacy байх ёстой. Гэтэл манайд эрх мэдэлд хүрэх нь өөрөө зорилго болчихсон" гэв.

Төрд ажиллаж байгаа хүн "жам ёсны эрхээсээ татгалзах" буюу эрх мэдэл нь хязгаарлагдмал, ёс зүйн өндөр түвшинд байх шаардлагатайг тэрбээр онцолж, төрийн албан хаагчийн хариуцлагын тогтолцоог шинэчлэх шаардлагатай гэв.

Эх сурвалж: Хэвлэлийн хүрээлэн