УИХ-ын гишүүн асан Ц.Цэрэнпунцаг МАН-ын Бага хуралд оролцжээ. Бага хурлын дараа сэтгүүлчид түүнээс хүүгийнх нь нэр холбогдсон хэргийн талаар тодруулсан байна.  

-Хэвлэлийнхэн энэ хэргийн талаар зөндөө худлаа юм бичсэн. Миний хүү хар тамхи хэрэглэсэн, эсэхийг би мэдэхгүй. Миний хүү 28 нас хүрсэн ч эцэг хүний хувьд би энэ хэрэгт анхаарна, санаа зоволгүй яах вэ. 50-60 хүрчихсэн хүүхдийнхээ араас санаа зовдог биз дээ. 

Би тэр хүүгийн эцэгтэй уулзсан, эрүүл мэндийнх нь төлбөрийг төллөө. Тэр хүүхдийн ирээдүйд анхааръя гэсэн. Солонгост сайн эмнэлэгт хийлгээд ирсэн гэсэн. Хэргийг хуулийнхан шийднэ, тэр дагуу явж байна. Тэр хүүд хилийн хориг тавиулах саналыг бид гаргаагүй, мөрдөн байцаагч нь гаргасан. 

Би хүүгийн аав Дашзэгвийг танана, мэднэ. Хүү нь 24 настай юм билээ. Мөрдөн байцаах ажил үргэлжилж байгаа тул зодолдсон шалтгааныг би ярихгүй. Манай хүүгийн найз охин руу янз бүрийн юм бичээд байсан учраас уурлаж, зодолдсон гэж манай залуу тайлбарласан. Ямар ч эр хүн дуртай байхгүй биз дээ. Би аавтай нь уулзаад эрүүл мэндэд нь анхаарлаа, уучлал гуйлаа. Миний хийж чадах нь л энэ. Хүн зодсон нь зөв гэж би хэлээгүй. Одоо надаас юу хүсээ вэ? 

Хүүгээ суллуулах шийдвэрийг хуулийн дагуу л гаргасан. Би шүүхэд яаж нөлөөлөх вэ? Харин ч би өндөр албан тушаалтай байсан тул миний хүү хатуу шийтгүүлээд 60 хоног хоригдоод өчигдөр (2025.09.26) гарлаа. Та нар тэр талаас нь яагаад бодохгүй байгаа юм. Хууль бүгдэд нь тэгш үйлчлэх ёстой.

УИХ-ын гишүүний хүүхэд, бизнес наймаа хийдэг гээд хүүхдийг нь хатуу шийтгэж болохгүй биз дээ? Миний хүү хэлмэгдэв үү гэж би санаа зовж байна. Би наана цаана аргалах гэж гүйгээгүй гэв.