Дэлхий дахинд Ковид-19 цар тахлын нийгэм, эдийн засагт үзүүлж буй сөрөг үр дагавар гүнзгийрсээр байна. Бараа материал, түүхий эд, хүнсний бүтээгдэхүүний импорт буурч, зарим нэр төрлийн хүнсний хомсдол үүссэн. Монгол улсын хүнс, ундааны үйлдвэрлэл импортоос өндөр хамааралтай тул цаашид газар тариаланд суурилсан хүнс, ундаа үйлдвэрлэлийг бие даасан болгож бэхжүүлэх хэрэгцээ байна.

Европын Холбооны SWITCH-Asia programme хөтөлбөрийн 1.76 сая еврогийн санхүүжилтээр хэрэгжих “Эдийн засгийн ногоон шилжилт” төслийн хүрээнд газар тариаланд суурилсан хүнс, ус, ундааны үйлдвэрлэл эрхэлдэг бичил, жижиг, дунд үйлдвэрлэгчид (БЖДҮ), борлуулагчдыг дараах арга замаар дэмжинэ:

· БЖДҮ, борлуулагчдын бүтээгдэхүүн үйлчилгээг ногоон шошготой болгон баталгаажуулах

· Тэдэнд чиглэсэн ногоон санхүүжилтийн хүртээмжийг нэмэх

· Илүү байгальд ээлтэй, үр ашигтай ажиллах, эдийн засгийн сайн туршлагыг дэлгэрүүлэх юм.

Хэрэглэгчдийн дотоодод үйлдвэрлэсэн, ногоон шошготой хүнс, ус, ундааны худалдан авалт нэмэгдсэнээр үндэсний үйлдвэрлэл хөгжих, үндэсний үйлдвэрлэгчдийн тогтвортой байдлыг хангах суурь бүрдэх юм.

“Эдийн засгийн ногоон шилжилт” төсөл 2030 он гэхэд хүлэмжийн хийн ялгаралтыг 22 хувиар бууруулах Парисын хэлэлцээрийг хэрэгжүүлэх Үндэсний хэмжээнд тодорхойлсон зорилтод хувь нэмэр оруулна.

Төслийг Пипл ин Нийд (ПИН), Каритас Чех Репаблик (КЧР) болон Монголын Тогтвортой Санхүүжилтийн Холбоо (ТоС), “Хөгжлийн Шийдэл” ТББ-ууд хамтран хэрэгжүүлнэ. Хүнс, ус, ундаа үйлдвэрлэдэг 1,500 БЖДҮ, энэ чиглэлийн бизнесийн 30 холбоо, 750 борлуулагчидтай ажиллах юм.

Энэ төсөл “Европын холбооноос дэвшүүлсэн Монгол Улсын ногоон хөгжлийг дэмжих зорилтыг бодитоор хэрэгжүүлэхэд чухал түлхэц болж байна. “Эдийн засгийн ногоон шилжилт” төсөл нь байгаль орчны тогтвортой байдалд эерэг нөлөөтэй хүнсний нийлүүлэлтийн сүлжээг дэмжиж, Монгол Улсад үйлдвэрлэсэн хүнс, ундааг сурталчлах болно” гэж Европын Холбооноос Монгол Улсыд суугаа Онц бөгөөд Бүрэн эрхт Элчин сайд Аксель Никейз төслийн ач холбогдлын талаар дүгнэжээ.

" Засгийн Газрын зүгээс манай эдийн засгийг ногоон болгоход үзүүлж буй Европын Холбооны дэмжлэг, хүчин чармайлтыг өндрөөр үнэлж байна. Бид “Эдийн засгийн ногоон шилжилт” төслийн хүрээнд нэвтрүүлэх Европын холбооны “Тариаланчаас таны ширээнд” стратегид суурилсан ногоон шошгожуулалтаар дамжуулан БЖДҮ, бизнесүүдийг ногоон шилжилт хийхэд нөлөө үзүүлэх энэү төсөлтэй нягт хамтран ажиллана” гэж Байгаль орчин, аялал жуулчлалын яамны Дэд сайд Г.Түвдэндорж мэдэгдсэн байна.

Хүнс үйлдвэрлэлийн салбарын байгаль орчинд учруулах нөлөө их. Иймд нүүрстөрөгч буюу хүлэмжийн хийн ялгарлыг багасган, тус салбарыг тойрог эдийн засагт шилжүүлэх замаар ядуурлыг хурдацтай бууруулах шаардлагатай. Төслийн хүрээнд Европын Комиссын хэрэгжүүлж буй байгалийн нөөцөд хэмнэлттэй шинэлэг арга зам болох “Тариаланчаас таны ширээнд” зарчмаас суралцаж нутагшуулах боломжтой.