3х3 сагсан бөмбөгийн оны тав дахь удаагийн challenger тэмцээн "Ulaanbaatar 2023"-ын хасагдах шатны тоглолтууд үргэлжилж байна.

Тэмцээний D хэсгийг тэргүүлж хасагдах шатанд шалгарсан Ulaanbaatar MMC Energy баг шөвгийн наймд Канадын Toronto KBA багтай тоглож 19-17 харьцаагаар хожлоо.

Ингэснээр тэд шөвгийн дөрөвт дэлхийн аварга Сербийн Ub Huishan NE багтай тоглохоор болов.

Үндэсний соёл амралтын хүрээлэнд хоёр хоног өрсөлдөж буй багуудаас шилдэг хоёр нь наймдугаар сард Швейцарт болох 3х3 сагсан бөмбөгийн дэлхийн цуврал тэмцээний нэг, оны долоо дахь мастерс буюу "Lausanne 2023"-т оролцох эрхтэй болно.

"Ulaanbaatar 2023"-ын аваргууд 15 мянган ам.долларын шагналыг авах бол дэд байр 10 000, 3-р байр 6000, 4-р байр 5000 ам.долларыг өвөртөлнө.

Ulaanbaatar MMC Energy баг дэлхийн аварга Сербийн UB Huishan багийг 21-20 харьцаагаар хожиж "Ulaanbaatar" challenger тэмцээний финалд шалгарлаа.

Дэлхийн чансааны 8-д бичигдэж буй монголын баг дэлхийн чансааг тэргүүлэгчдийг ийнхүү анх удаа хожсоноор "Lausanne 2023" мастерст оролцох эрхтэй боллоо.

Өмнөх хоёр удаагийн мастерс тэмцээнд түрүүлээд байсан Ub багийн 21 дараалсан хожлын цуврал энэ хүрээд зогслоо.

Ulaanbaatar MMC Energy баг тэмцээний финалд Бельгийн "Antwerp Topdesk" багтай тоглож үндсэн цагт 19-19 харьцаагаар тэнцлээ. Улмаар нэмэлт цаг сунгахад Бельгийн баг холын зайн шидэлтээ амжилттай болгож 21-19 харьцаагаар хожив.

Монголын баг финалд хожигдсон ч Швейцарт болох мастерс тэмцээний эрхээ авсан билээ.

Ulaanbaatar MMC Energy багийн бүрэлдэхүүн:

• Марко Дугоия (Серби)
• Цогтын Отгонжаргал
• Даваасамбуугийн Дэлгэрням
• Стив Сөр (Канад)