Монгол, Казахстаны Засгийн газар хоорондын комиссыг Монгол Улсын Засгийн газрын гишүүн, Хүнс, хөдөө аж ахуй, хөнгөн үйлдвэрийн сайд Ж.Энхбаяр ахлахаар болжээ. 

Тодруулбал Ерөнхийлөгч У.Хүрэлсүхийн урилгаар Бүгд Найрамдах Казахстан Улсын Ерөнхийлөгч Касым-Жомарт Токаев төрийн айлчлал хийсэн. Энэ үеэр хоёр улсын харилцааг “Стратегийн түншлэл”-ийн түвшинд шат ахиулан хөгжүүлэхээр тогтсон. 

Энэ хүрээнд

1. Улс төр, аюулгүй байдал, батлан хамгаалах;
2. Худалдаа, эдийн засаг;
3. Боловсрол, соёл, шинжлэх ухаан, мэдээллийн технологи;
4. Тээвэр, логистик, аялал жуулчлал, иргэдийн харилцаа;
5. Бүс нутаг, олон улсын тавцан дахь хамтын ажиллагаа гэсэн таван  тулгуур чиглэлд хамтын ажиллагааг гүнзгийрүүлэн өргөжүүлэхээр болсон юм.

Комиссыг ахлах Ж.Энхбаяр сайд хоёр орны тээвэр логистик, хөдөө аж ахуй, соёл, аялал жуулчлал, мэдээлэл технологийн салбарт харилцаа, хамтын ажиллагааг өргөжүүлэх чиглэлд анхаарч ажиллана.

Монгол, Казахстан хоёр улс нь хөдөө аж ахуйн салбарын хамтын ажиллагааг эрчимжүүлэх зорилгоор Казахстаны эрт болцтой, ганд тэсвэртэй үр тарианы сортуудыг Монгол Улсад турших, эрдэм шинжилгээ, судалгааны ажлуудыг хамтран зохион байгуулах, Монгол Улсаас Казахстан Улс болон тус улсаар дамжуулан бүс нутгийн гуравдагч улс орнууд руу мах, махан бүтээгдэхүүн экспортлох, Монгол Улсад Казахстан Улсын цагаан будаа тариалалтын туршлага, хамтарсан төсөл хэрэгжүүлэх, Казахстан Улсаас “казахын цагаан толгойт” үүлдрийн үхрийг Монголд нийлүүлэх ажлыг эрчимжүүлнэ. 

Мөн “Тэрбум мод” үндэсний хөдөлгөөн, Казахстан Улсын дэвшүүлсэн “Хоёр тэрбум мод” тарих хоёр улсын санаачилгыг уялдуулан мод үржүүлгийн чиглэлээр хамтран ажиллах аж. 

Эх сурвалж: ХХААХҮЯ