Манай улсад хүн худалдаалах гэмт хэрэг улам нарийн, зохион байгуулалттай болж байна. Энэ гэмт хэргийн хохирогчид мөлжлөг, хүчирхийллээс улбаатай, бие махбод, сэтгэцийн гэмтэлд өртдөг. Бид үүнийг үл хайхарвал хохирогч хүүхдүүд насан туршийн хар толботой үлдэх магадлалтай.

Хүн худалдаалах гэмт хэргийг аль ч улсад үйлдэх боломжтой бөгөөд Монгол Улс илгээгч, дамжуулагч, хүлээн авагч орон гэж олон улсын тайлан илтгэлүүдэд дурджээ.

Хүн худалдаалах гэмт хэргийн хохирогч болсон эсвэл эрсдэлд орох гэж буйгаа хэрхэн мэдэх вэ. Та дараах зөвлөмжийг сайтар уншаарай.

• Нэгдүгээрт, хэн нэгэн танд гадаад болон дотоодод үндэслэлгүйгээр өндөр цалинтай, хялбар ажлын санал тавьсан бол
• Хоёрдугаарт, таныг гадаад улс руу зорчихтой холбоотой зардлыг төлж байгаа бол
•  Гуравдугаарт, хэрвээ ажил олгогч нь бичиг баримтыг тань хураан авч та дуртай үедээ явах эрхээ хязгаарлуулсан бол
• Дөрөвдүгээрт, ажил олгогч зарцуулсан зардлаа нөхөн авах нэрийдлээр цалин хөлсгүй болон хэт бага цалингаар, урт цагаар ажиллуулж өрийн дарамтанд оруулсан бол
• Тавдугаарт, виз, бичиг баримтын зөрчил зэргийг далимдуулан сэтгэл зүйн дарамтад оруулсан
• Зургаадугаарт, анх санал болгосноосоо өөр ажил албадаж хийлгэсэн.
• Долоодугаарт, тухайн газраас явбал өөрт болон гэр бүл, ойр дотнын хүмүүст нь хохирол учруулна гэж заналхийлдэг
• Наймдугаарт, бэлгийн болон бие махбодын хүчирхийлэлд орсон.  
• Есдүгээрт, таны чөлөөтэй зорчих, гарах, орох эрхийг хязгаарласан бол хүн худалдаалах гэмт хэргийн хохирогч болсон эсвэл эрсдэлд орсон байж болох юм байна шүү.