#Шатар 45 дахь удаагийн шатрын олимпиадын Зургаадугаар өрөгт Монголын эмэгтэй шигшээ баг анхны хожигдлоо амслаа. Тэд Гүржид 2.5-1.5 харьцаагаар хожигдож 7-р байр руу ухарсан байна.

FIDE (The International Chess Federation)-аас зохиодог 45 дахь удаагийн шатрын олимпиад Унгарын нийслэл Будапешт хотод үргэлжилж байна.

Энэ сарын 23-ыг дуустал үргэлжлэх тэмцээний Зургаадугаар өрөгт Монголын эмэгтэй шигшээ баг Гүржтэй, эрэгтэй шигшээ баг Болгартай тоглов.

• Эмэгтэй шигшээ баг тавдугаар өрөгт АНУ-ыг хожсоноор 3-р байрт бичигдэж эхэллээ
• Шатрын эмэгтэй шигшээ баг Испанийг хожсоноор 7-р байр руу дэвшлээ
• Эрэгтэйчүүд дахин тэнцэж, эмэгтэй баг гурав дахь өрсөлдөгчөө яллаа

Эмэгтэй шигшээ баг Зургаадугаар өрөгт өрөгт Гүржийн шигшээ багт 2.5-1.5 харьцаагаар хожигдсон бөгөөд Э.Хүслэн бүтэн оноо алджээ.

• WGM Төрмөнхийн Мөнхзул /Хар/ 0.5-0.5 /Цагаан/ GM Нана Жагнидзе
• IM Батхуягийн Мөнгөнтуул /Цагаан/ 0.5-0.5 /Хар/ IM Лела Жавахишвили
• IM Даваадэмбэрэлийн Номин-Эрдэнэ /Хар/ 0.5-0.5 /Цагаан/ GM Белла Хотенашвили
• WFM Эрдэнэбаярын Хүслэн /Цагаан/ 0-1 /Хар/ IM Саломе Мелиа

Ингэснээр эмэгтэй шигшээ баг 10 (14.5) оноотой 7-р байр руу ухрав. Харин Гүржийн шигшээ баг 11 оноотой 2-р байр руу дэвшлээ. Эмэгтэйчүүд нэг өдөр өнжөөд Долоодугаар өрөгт Германы шигшээ багтай тоглоно.

Харин эрэгтэй баг Зургаадугаар өрөгт Болгарын шигшээ багтай тоглож 3-1 харьцаагаар хожигдлоо. Эрэгтэй багаас С.Чингүүн, М.Амилал нар тэнцэж тал оноогоо авсан байна.

Эрэгтэй шигшээ баг 6 (13.5) оноотой 70-р байрт бичигдэж байгаа бөгөөд Долоодугаар өрөгт Ливаны шигшээ багтай тоглоно.

Дэлхийн 197 орны тамирчид оролцож буй тэмцээн нэг өдөр завсарлаад Долоодугаар өргөөр эргэн ирнэ.