#PUBGMobile Төв, Өмнөд Азийн аварга шалгаруулах намрын тэмцээнд Монголын "4Merical Vibes" баг аваргалж, Монголын "Falcons Force", "Stalwart Esports" удаах байрыг эзлэв. Харин өнгөрсөн жилийн аварга "IHC ESPORTS" баг дэлхийн аваргад оролцох эрхээ авч чадсангүй.

PUBG Mobile (Player Unknown's Battle Ground Mobile)-ын Төв, Өмнөд Азийн аварга шалгаруулах намрын тэмцээн буюу "PUBG Mobile Super League - Central and South Asia Fall 2024" Балба улсын нийслэл Катманду хотод боллоо.

200 мянган ам.долларын шагналын сантай тэмцээнд Монголын таван баг Казахстан, Балба, Бангладеш, Пакистан, Алс Дорнод (Орос), Узбекистаны шилдэг багуудтай өрсөлдсөн бөгөөд дөрөв нь финалд шалгараад байв.

Гурван өдөр үргэлжилсэн 18 удаагийн шүхрээр буултын дараагаар Монголын "4Merical Vibes" баг аваргалж 36 мянган ам.долларын шагнал авлаа.

• Монголын дөрвөн баг Төв Азийн аваргын финалд шалгарлаа
• ЕСДҮГЭЭР САРЫН СПОРТ: Паралимп, TI13
• PUBG Mobile-ын Төв Азийн аварга шалгаруулах намрын тэмцээнд Монголын таван баг оролцоно

Нийт 20 баг таван хэсэгт хуваагдан гурван долоо хоног өрсөлдсөн лигийн тэмцээнээс хамгийн өндөр оноотой 16 баг финалд шалгарсан юм. Лигийн тэмцээнээс цуглуулсан оноо болон финалын 18 map-ын дараагаар ялагчид тодорсон.

Дэд байр эзэлсэн Монголын "Falcons Force" баг лигийн оноогоор, Монголын "Stalwart Esports" баг финалд эзэлсэн байраар энэ жилийн дэлхийн аварга шалгаруулах тэмцээн буюу "PUBG Mobile Global Championship 2024" оролцох эрхээ авав. Харин өнгөрсөн жилийн аварга "IHC ESPORTS" баг дэлхийн аваргад оролцох эрхээ авч чадсангүй.

Тэмцээний шилдэг тоглогчоор түрүүлсэн багийн мэргэн бууч Ууганбаярын "DOK" Дөлгөөн тодорч 800 ам.долларын шагнал авсан. Тэрээр мөн "Gunslinger" шагналын эзэн болж 700 ам.доллараар шагнуулсан юм.