“Оюу толгой” компани 2024 оны хоёрдугаар улирлын үйл ажиллагааны голлох үзүүлэлт, гүний уурхайн төслийн явцаа танилцууллаа.  

• Бид гүний уурхайн олборлолтыг нэмэх зорилгын хүрээнд энэ улиралд 14 хүдэр буулгуур тэсэллээ. Улмаар Панел 0 олборлолтын түвшний нийт хүдэр буулгуурын тоо 114 болсон .  
• Хүдрийн биетийг гүний уурхайгаас газрын гадарга руу тээвэрлэх туузан дамжуургын ажил үргэлжилж, хоёрдугаар улирлын эцэст 97 хувийн гүйцэтгэлтэй байна.  
• Баяжуулах үйлдвэрийн өргөтгөлийн барилгын ажил төлөвлөгөөний дагуу үргэлжилж байна. Энэ оны хоёрдугаар улирлаас 2025 оны хоёрдугаар улирал хүртэл үе шаттайгаар ашиглалтад оруулж дуусгах төлөвтэй байна.  
• Анхдагч бутлуур 2-ын барилгын ажил хэвийн үргэлжилж, 2025 оны эцэс гэхэд дуусах төлөвлөгөөтэй байна.
• Гүний уурхайн бүтээн байгуулалтдаа хэд хэдэн томоохон дэвшилд хүрч чадлаа. Босоо амын баг нь агааржуулалтын урд ба хойд амыг гүний уурхайтай амжилттай холболоо. Уг хоёр босоо амны нэвтрэлтийн ажилтай холбоотой дэд бүтцийг амжилттай гарган авсан ба одоогоор агааржуулалтын хойд амны сорох сэнс болон урд амны агаар халаагчийг холбох ажил өрнөж байна. Энэхүү хоёр босоо ам нь гүний уурхайн агааржуулалтыг нэмж, гүний уурхайн үйлдвэрлэл ирэх жилүүдэд бүрэн хүчин чадлаараа ажиллах боломжийг олгоно.

Энэ оны хоёрдугаар хагаст Хамтын гэрээг шинэчлэх хэлэлцээ хийнэ. Бидний үйлдвэрчний эвлэлтэй хийсэн одоогоор хүчин төгөлдөр мөрдөж буй гэрээний хугацаа 2025 оны дөрөвдүгээр сард дуусах юм.