Өнгөрч буй долоо хоногт өрнөсөн онцлох үйл явдлуудаас тоймлон хүргэж байна.  

ГАШУУНСУХАЙТ-ГАНЦМОД БООМТЫН ТӨМӨР ЗАМЫГ ХОЛБОХ МОНГОЛ, ХЯТАД УЛСЫН ЗАСГИЙН ГАЗАР ХООРОНДЫН ХЭЛЭЛЦЭЭРИЙГ БАТАЛГААЖУУЛАВ



Монгол Улсын Ерөнхий сайд Л.Оюун-Эрдэнэ БНХАУ-д ажлын айлчлал хийж байна. Айлчлалын эхний өдөр буюу өчигдөр /2025.02.14/ БНХАУ-ын Төрийн зөвлөлийн Ерөнхий сайд Ли Чянтай Харбин хотноо уулзав.

Энэ бол хоёр орны Ерөнхий сайд нарын тав дахь удаагийн уулзалт юм. Уулзалтаар хоёр улсын Засгийн газрын тэргүүн нар 2024 оны 11-р сард Шанхай хотноо уулзсанаас хойш Монгол, Хятадын харилцаа, хамтын ажиллагаа идэвхтэй өрнөж, тодорхой ололт амжилт гарч буйд сэтгэл хангалуун буйгаа илэрхийллээ.

Уулзалтаар Монгол Улсын Засгийн газрын хөгжлийн 14 мега төслийн нэгдүгээрт эрэмбэлэгдсэн Гашуунсухайт-Ганцмод боомтын хил дамнасан төмөр замыг холбох Монгол Улсын Засгийн газар, БНХАУ-ын Засгийн газар хоорондын хэлэлцээрт гарын үсэг зурж, баталгаажууллаа.

Энэ төсөл 2004 оноос эхлэн яригдаж, 2008 оноос хойш 17 жилийн хугацаанд нийт 60 гаруй удаагийн яриа хэлэлцээ хийж, Үндэсний аюулгүй байдлын зөвлөлийн 3 зөвлөмж, Улсын Их Хурлын 6 тогтоол, Засгийн газрын 45 тогтоол гарсны эцэст ийнхүү эцэслэн шийдвэрлэгдэж байна.

Гашуунсухайт-Ганцмод хил дамнасан төмөр зам нь Монгол Улс, БНХАУ-ын хооронд 1955 оны хэлэлцээрээр байгуулсан Замын-Үүд, Эрээн төмөр замаас хойш хийгдэж буй хоёр дахь холболтын төмөр зам болж байна.

16 ХҮРТЭЛХ НАСНЫХНЫГ НИЙГМИЙН СҮЛЖЭЭНД НЭВТРЭХИЙГ ХОРИГЛОХ ХУУЛИЙН ТӨСӨЛ БОЛОВСРУУЛНА



Боловсролын сайд П.Наранбаяр өнгөрсөн баасан /2025.02.14/ гарагт мэдээлэл хийж, 16 хүртэлх насны хүүхдийг фэйсбүүк, твиттер, снапчат, тик ток зэрэг нийгмийн сүлжээнд хандахыг хориглох хуулийн төсөл боловсруулахаар судалж эхэлсэн тухай мэдэгдлээ.

Дээрх нийгмийн сүлжээгээр хүүхэд насанд нь тохироогүй агуулгатай бичлэг, мэдээллүүд цацагдаж, хүүхдийг уруу татах, хүүхдүүдийн хооронд цахим дээрэлхэлт үүсгэх зэрэг олон асуудал гарч байна. Үүнээс хүүхдээ хамгаалах нь бидний үүрэг. Нийгмийн суурь шинжтэй энэ асуудлыг шийдэхийн тулд нийгэм, олон нийтээр хэлэлцэн зөвшилцөлд хүрэх хэрэгтэй хэмээн салбарын сайд хэллээ.

Боловсролын сайдын мэдэгдэлтэй холбогдуулан GoGo.mn сайт “16 хүртэлх насны хүүхдийг нийгмийн сүлжээнд нэвтрэхийг хориглохыг Та дэмжих үү?” гэсэн санал асуулга явуулж байна. Та саналаа өгөх бол ЭНД дарна уу.

Австрали удс 2024 оны 11-р сарын 29-нд 16 хүртэлх насны хүүхдийг цахим орчинд ялангуяа фэйсбүүк, твиттер, снапчат, тик ток зэрэг цахим сүлжээнд хандахыг хориглох хууль баталсан нь өдгөө дэлхий дахины анхаарал татаж буй юм.  

Европын орнууд энэ чиглэлээр алхмууд хийж байна. Жишээлбэл, Франц улсад 15-аас доош насны хэрэглэгчид нийгмийн сүлжээ ашиглах бол эцэг, эхээс зөвшөөрөл авна. Норвеги улс 13 хүртэлх насныхан нийгмийн сүлжээ ашиглахыг хориглоод байсан бол хүрээг нь тэлж, 15 нас болгохоор ярьж байна. Герман улсад 13-16 насны хүүхэд эцэг, эхийн зөвшөөрөлтэйгээр нийгмийн сүлжээ ашигладаг. 

ХАРБИН-2025: О.МИШЭЭЛ 19, Г.МАРАЛ-ЭРДЭНЭ 20-Р БАЙРТ ОРЛОО

БНХАУ-ын Харбин хотод Азийн өвлийн спортын IX наадам хоёрдугаар сарын 7-14-ний өдрүүдэд болж, 34 орны 1275 тамирчин зургаан спортын 11 төрлийн  64 зай, ангилалд өрсөлдлөө. Энэ удаагийн Азийн наадамд Монгол Улсаас дөрвөн спортын долоон төрөлд 28 дасгалжуулагчийн удирдлага дор 35 тамирчин оролцож байгаа нь түүхэндээ хамгийн олон бүрэлдэхүүн болов.



Уран гулгалтын эмэгтэйчүүдийн чөлөөт үзүүлбэрийн ганцаарчилсан төрөлд 24 тамирчин оролцсон бөгөөд манай улсаас дасгалжуулагч Тэцүкацү Накашимагийн удирдлага дор О.Мишээл (55.30 оноо), дасгалжуулагч Рина Хорегийн удирдлага дор Г.Марал-Эрдэнэ (54.72 оноо) нар чөлөөт үзүүлбэрээ үзүүлжээ.

О.Мишээл 19 дүгээр байр, Г.Марал-Эрдэнэ 20 дугаар байрт орлоо. Г.Марал-Эрдэнэ Азийн наадамд хоёр дахь удаагаа оролцсон бол О.Мишээлийн анхны Азийн наадам, мөн насанд хүрэгчдийн анхны тэмцээн нь энэ байв.

ДОНОРЫН ЭЛГИЙГ ДУРАНГААР ТАЙРАХ МЭС ЗАСЛЫГ НЭВТРҮҮЛЛЭЭ

Хавдар судлалын үндэсний төвд 2018 оноос элэгний хорт хавдартай өвчтөнд амьд донороос элэг шилжүүлэх мэс заслыг нутагшуулснаас хойш 180 удаа элэг шилжүүлэн суулгажээ. Амьд донороос эрхтэн шилжүүлэх мэс засалд донорын аюулгүй байдлыг хангах, мэс заслын дараах амьдралын чанарыг хадгалах асуудал нэн чухал.

Тус эмнэлгийн эрхтэн шилжүүлэн суулгах багийнхан 2024 оноос элэг шилжүүлэн суулгах мэс засалд донорын баруун элгийг дурангийн аргаар тайрах технологийг нутагшуулахаар бэлтгэж эхэлсэн бөгөөд өнгөрсөн даваа гарагт /2025.02.10/ анхны хагалгаагаа амжилттай хийжээ.

Эрүүл байж, бусдад амьдрал бэлэглэж буй донорын элгийг хөнөөл багатай дурангийн аргаар тайрч авснаар донор хагалгааны дараа богино хугацаанд илаарших, биед үүсэх шархны хэмжээ жижиг болж, гоо сайхны хувьд хохирол бага байх боломж бүрдлээ.

НИЙСЛЭЛД ХҮНДЭТГЭХ ШАЛТГААНААР 48 ЦАГААС ДЭЭШ ХУГАЦААГААР ЗОРЧВОЛ 5000 ТӨГРӨГ ТӨЛӨХГҮЙ

Нийслэлийн ИТХ-ын 2024 оны хоёрдугаар сарын 8-ны өдрийн тогтоолоор авто зам ашигласны төлбөрийн хэмжээг шинэчлэн баталсан. Уг тогтоолд нийслэлд бүртгэлгүй орон нутгийн тээврийн хэрэгсэл нийслэлд 48 цаг буюу хоёр өдөр зорчвол 1000 төгрөг төлнө. Харин 48 цагаас дээш хугацаанд зорчвол хоногт 5000 төгрөг төлөхөөр тусгасан.



Нийслэлийн Засаг даргын 2025 оны нэгдүгээр сарын 28-ны өдрийн захирамжаар дараах дөрвөн шалтгаанаар нийслэлд зорчсон орон нутгийн тээврийн хэрэгсэлтэй иргэдээс төлбөр авахгүй байх өөрчлөлт орууллаа. Хоёрдугаар сарын 15-ны өдрөөс төлбөрөөс чөлөөлөгдөх иргэний хүсэлт, нотлох баримтыг www.ubtraffic.mn сайтаар хүлээн авч эхэлжээ.