“Япон улс байгалийн гамшигт өртөх нь их. Гамшгийн үед засгийн газартайгаа хэрхэн хамтарч, хариу арга хэмжээ авах тухайд бид туршлагатай. Сайн туршлагаа Зүүн Азийн улсуудад хуваалцан ажиллаж байна.

Тухайлбал, Монголд сүүлийн жилүүдэд газар хөдлөлт, цөлжилт, уур амьсгалын өөрчлөлт, ган гачиг элбэгшээд буй. Тиймээс Монголын улаан загалмайн нийгэмлэгтэй хамтран туршлага хуваалцаж, заавар зөвлөмж өглөө” хэмээн Японы Улаан загалмайн ерөнхийлөгч Ацүши Сэйкэ ярилаа.

Тэрбээр Монголд зохион байгуулж буй “Зүүн Азийн улаан загалмайн удирдагчдын уулзалт”-д ирээд буй. Зүүн Азийн орнуудын Улаан загалмайн удирдагчид жил бүр уулзаж, бүс нутгийн тулгамдсан асуудлыг хэлэлцэн, үйл ажиллагааны шилдэг арга туршлага хуваалцдаг юм. Мөн хамтран ажиллах чиглэл, тэргүүлэх зорилтуудаа тодорхойлдог.

Ацүши Сэйкэ “Энэ жилийн уулзалт 100 гаруй оролцогчоос бүрдэж байна. Энэ нь бидний хөндөж байгаа асуудал ийм хэмжээний өргөн цар хүрээтэйг илтгэнэ. Мөн эмэгтэйчүүдийн оролцоог Ази Номхон далайн бүс нутагт нэмэгдүүлэх, хүүхэд залуучуудыг сургаж дадлагажуулах асуудлыг хэлэлцэж байна.

Нийгмийн халамжийн чиглэлээр техник, арга зүйн дэмжлэгийг Монголын улаан загалмайн нийгэмлэгт хүргэдэг” гэв

Хятадын улаан загалмайн нийгэмлэгийн салбар Хонгконгийн улаан загалмайн Ерөнхий нарийн бичгийн дарга Со Юэн Хан “Гамшиг болон дасан зохицох чиглэлийн ажлуудын талаар хэлэлцлээ. Зөвхөн зүүн Азийн орнууд гэлтгүй Хойд Америк, Европийн орнуудын туршлагыг нэвтрүүлэх талаар судаллаа” гэж хэллээ.

Өнгөрсөн оны арваннэгдүгээр сард Вьетнам улсын нийслэл Ханой хотноо болсон “Ази Номхон далайн бүсийн Улаан загалмай Улаан хавирган сар нийгэмлэгүүдийн 11 дэх удаагийн бага хурал”-аас дэвшүүлсэн уриалгыг баталсан. Энэ форумаар удирдагчдын түвшинд дээрх уриалгыг хэлэлцэж буй аж.

М.Лхагвадулам