Эдийн засгийн хөгжлийн сайд Л.Гантөмөр өнгөрсөн сарын 24-нд хэвлэлийн хурал хийсэн. Тэрээр "PCmall дэлгүүр орлогоо нотлолгүй, урьдчилгаа өгөлгүй ав гэсэн реклам явуулдаг нь буруу. Энэ нь импортыг өдөөж, санхүүгийн олон дүрмийг зөрчиж байна.

Банкнуудын зээл олгохдоо тавьдаг бүх шалгуурыг энэ дэлгүүр тавихгүй юм байна. Oүнийг СЗХ анхаарна биз. Нэг иргэний нэг ББСБ-аас авсан зээлийг нөгөө ББСБ нь мэдэхгүй байна, мэдээллээ дор бүр нь хуваалцдаггүй. Банк, ББСБ-уудаас давхар зээлтэй 350 мянган хүн байна. Энэ маш ноцтой. Эдгээр иргэд орлогынхоо 20 хувиар л амьдарч байна. Санхүүгийн зохицуулах хороо ажлаа хийхгүй, хяналтаа сайн тавихгүй байна. Тус байгууллага ойрын хугацаанд өр, орлогын харьцааг зохицуулах ёстой" гэсэн юм.

Энэ талаар Санхүүгийн зохицуулах хорооноос тодруулав.
-Цахилгаан бараа, автомашин худалдагчид хэрэглэгчдэд орлогоо нотлолгүй, урьдчилгаа өгөлгүй бараа худалдаж байгаа нь санхүүгийн түрээсийн үйлчилгээ юм. Үүний тулд тухайн ААН тусгай зөвшөөрөл авах шаардлагагүй байдаг тул манай байгууллага шууд зохицуулах боломжгүй. 2013 оноос манай улсад санхүүгийн түрээсийг олон ААН үзүүлж байна.

Банк, ББСБ-уудаас давхар зээлтэй иргэд бий нь үнэн. Учир нь Зээлийн мэдээллийн сангийн тухай хуульд зааснаар банк, ББСБ хэн нэгэнд зээл олгосон бол тухайн мэдээллээ 72 цагийн дотор Зээлийн мэдээллийн сан руу оруулах үүрэгтэй. Монголбанкны Ерөнхийлөгч 2024 онд тушаал гарган, энэ хугацааг 24 цаг болгосон ч хэрэгжихгүй байна. Монголбанкны дэргэдэх Зээлийн мэдээллийн санг хоёр ААН тусгай зөвшөөрлийн дагуу шинэчлэн хариуцаж ажилладаг.

Өр орлогын харьцааны тухайд 2025.01.01-нээс ББСБ-уудын мөрдөх ёстой өр, орлогын харьцаа 70/30 болсон гэв. Харин Монголбанк өнгөрсөн долоо хоногт хуралдаад, банкнуудын зээл олгохдоо мөрдөх өр орлогын харьцааг 50/50 болгосон юм.