Тавдугаар сарын 23-наас эхлэн зохиогдсон залуучуудын УАШТ-ий медалийн эзэд болон шилдгүүд өчигдөр тодорлоо.

Тэмцээнд оролцсон нийт 200 орчим тамирчин дунд лигийн хэмжээнд өрсөлддөг 80 гаруй залуу хөлбөмбөгчид тоглосон.

Энэхүү ширүүн өрсөлдөөнд, бүрэлдэхүүнд нь нэг ч лигийн тоглогч байхгүй "Монголын Тэмүүлэл" клуб тэргүүлж, "Сэлэнгэ Пресс", "Улаанбаатар" клуб удаалав.

Залуучуудын улсын аваргын алтан медалийн төлөө "Сэлэнгэ Пресс", "Монголын Тэмүүлэл" клүбүүд тоглохоор тунан үлдээд байсан.

Хагас шигшээд хүчирхэг өрсөлдөгч "Хоромхон"-ыг 6:3-аар илүүрхээд байсан Ц.Ганболдын дасгалжуулагчийн залуус шийдвэрлэх тоглолтын эхний гоолыг оруулсан. Багийн шилдгүүдийн нэг Л.Намбарнанзад нэгдүгээр үеийн 40 дэх минутад багтаа тэргүүллийг авч ирсэн нь тэр байлаа.

Гарааны бүрэлдэхүүнд нь хэд хэдэн лигийн тоглогчид багтсан "Сэлэнгэ Пресс" клубын залуус алдсан гоолоо нөхөх гэж хоёрдугаар үед илүүтэйгээр довтолсон.

Гэвч "Монголын Тэмүүлэл"-ийн гоолын машин Г.Цолмонбаатар 70 дахь минутад Б.Мөнхболдын хаалгыг мялааж, тоог 2:0 болгосон.

Гэхдээ түүний гоолоос ганцхан минутын дараа хаалгач Э.Энхбилгүүн торгуулийн талбайдаа алдаа гаргасан. Тийнхүү Б.Итгэл 11 метрийн торгуулийн цохилтыг амжилттай гүйцэтгэснээр тоог ойртуулав. Үлдсэн цагт хашир туршлагатай дасгалжуулагч Ц.Ганболдын ганц гоолын зөрүүгээ амжлттай хамгаалж, "Монголын Тэмүүлэл" залуучуудын УАШТ-нд түрүүллээ.

Тэмцээний шилдгүүдийг тодруулахад:

• Шилдэг хаалгач: Б.Мөнхболд /Сэлэнгэ Пресс/
• Шилдэг хамгаалагч: Ц.Мөнгөншагай /Хоромхон/
• Шилдэг хагас хамгаалагч: Г.Цолмонбаатар /Монголын Тэмүүлэл/
• Шилдэг довтлогч: Кашиваги Томояа /Улаанбаатар/
• Шилдэг шүүгчээр Э.Нямсайхан /МХБХ шалгарлаа.