Монголын энх тайван, найрамдлын байгууллагын Ерөнхийлөгч Д.Загджав тэргүүтэй төлөөлөгчид энэ сарын 8-нд Минск хотод ажлын айлчлал хийв.

Тэд Бүгд Найрамдах Беларус улсын Энх тайвны сангийн ТУЗ-ын дарга Максим В.Миськогийн урилгаар айлчилсан юм.

Тэд юуны өмнө Минск хотын төв дэх Дэлхийн хоёрдугаар дайны баатруудад зориулсан Ялалтын хөшөөнд цэцэг өргөв.

Энэ ёслолд Беларусь улсын Энх тайвны сангийн ТУЗ-ын орлогч дарга Александр В.Чирко, МЭТНБ-ын Тусгай үүрэг гүйцэтгэгч Нарийн бичгийн дарга Г.Тэнгэр МЭТНБ-ын Хөрш орнуудын газрын захирал Э.Ундраа, МЭТНБ-ын Хамтын ажиллагааны нэгдүгээр нарийн бичгийн дарга Ч.Заяа нар оролцов.

Дараа нь Бүгд Найрамдах Беларусь улсын Парламентын Удирдах Зөвлөлийн орлогч дарга Владимир П.Гуминский МЭНБ-ын Ерөнхийлөгч Д.Загджавыг Засгийн газрын ордонд хүлээн авч уулзлаа.

Уулзалтын үеэр Владимир П.Гуминский, Беларусийн тал Монгол Улсад 2014 оны зургаадугаар сард Элчин сайдын яамаа нээсэн нь хоёр орны харилцаа, хамтын ажиллагааг хөгжүүлэхэд ач холбогдолтой үйл явдал болсныг онцлов. Энэ нь хоёр талын хамтын ажиллагааг эрчимтэй хөгжүүлэх гол үндэс гэж үзэж буйгаа илэрхийллээ.

Хоёр орны парламент хоорондын харилцаа, хамтын ажиллагааг хөгжүүлэхэд УИХ-ын зүгээс анхаарч, өнгөрсөн онд Монгол-Беларусийн парламентын бүлэг байгуулсан юм. МЭТНБ-гын Ерөнхийлөгч Д.Загджав Беларусийн хот тохижилтын техник хэрэгсэл, хүнд даацын машин механизм зэрэг олон төрлийн бүтээгдэхүүнийг Монголын тал сонирхож байгааг илэрхийлж, хоёр орны эдийн засгийн хамтын ажиллагаа, харилцааны ирээдүйтэй чиглэлүүдийн талаар санал солилцов.

Уулзалтад Парламентын Олон улсын харилцааны Байнгын хорооны дарга Виталий Л.Бусько, Парламентын аж үйлдвэр, түлш, эрчим хүчний цогцолборын Байнгын  хорооны орлогч дарга Сергей Н. Бохан, Парламентын Үйл ажиллагаа хангах ТУЗ-ын орлогч дарга Ольга Л.Дудецкая, Беларусийн Энх тайвны сангийн ТУЗ-ын дарга Максим В.Мисько, тус сангийн ТУЗ-ын орлогч дарга Александр В. Чирко нар байлцав.

БНБеларусь улсын Хөгжлийн Банкны ТУЗ-ын орлогч дарга Василий А.Швед Монголын Энх тайван, Найрамдлын Байгууллагын Ерөнхийлөгч Д.Загджавыг хүлээн авч уулзлаа.

Хөгжлийн Банкны ТУЗ-ын орлогч дарга Василий А.Швед болон тус банкны төлөөлөгчид өнгөрсөн гуравдугаар сард Ерөнхий сайдын орлогч В.И.Семашкогийн Монгол Улсад хийсэн айлчлалын бүрэлдэхүүнд орсон юм.

Тэд Хөгжлийн банкны үйл ажиллагааны талаар танилцуулсны сацуу Монгол Улстай илүү өргөн хүрээнд хамтран ажиллах сонирхолтой байгаагаа илэрхийлэв.

Эдгээр уулзалтын үеэр Беларусын тал Монгол Улстай байгуулсан харилцаагаа эдийн засгийн салбарт илүүтэй хөгжүүлэх сонирхолтой байгаагаа илэрхийлж байв.