УИХ-ын хаврын чуулган өнөөдөр буюу дөрөвдүгээр сарын 5-ны өдөр нээлтээ хийх товтой байна. 2012 оны сонгуулиар байгуулагдсан Парламентын хувьд бүрэн эрхийн хугацаан дахь хамгийн сүүлийн чуулган гэдгээрээ анхаарал татаж байгаа юм.

Хаврын чуулганаар УИХ-ын болон аймаг, нийслэлийн ИТХ-ын ээлжит сонгуулийг товлон зарлах тухай” тогтоолын төсөл, Монгол Улсын эдийн засаг, нийгмийг 2017 онд хөгжүүлэх Үндсэн чиглэл батлах тухай” тогтоолын төсөл, 2017 оны төсвийн хүрээний мэдэгдэл, 2018-2019 оны төсвийн төсөөллийн тухай хуулийн төслийг хэлэлцэхээр төлөвлөсөн байна.

Үүнээс гадна Авилгатай тэмцэх, хариуцлага, шударга ёсыг бэхжүүлэх үндэсний хөтөлбөрийг батлах тухай” УИХ-ын тогтоолын төслийг хэлэлцэх асуудлын жагсаалтад оруулжээ. Ээлжит бус чуулганаар хэлэлцэж, эцсийн хэлэлцүүлэгт шилжүүлсэн Татварын ерөнхий хуулийн төслийг хаврын чуулганаар мөн хэлэлцэж магадгүй байна.

Учир нь УИХ-ын даргын захирамжид зааснаас бусад хэлэлцүүлгийн шатанд байгаа болон хууль санаачлагчаас УИХ-д өргөн мэдүүлсэн бусад хуулийг хэлэлцүүлэх асуудлыг тухай бүрт нь Зөвлөлөөр хэлэлцүүлэн шийдвэрлэж байхаар захирамжласан юм.

Хууль санаачлагчийн мэдээлснээр бизнест ээлтэй орчин бүрдүүлэх замаар тодорхой салбарт үйл ажиллагаа эрхлэгч, татвар төлөгчдийг татварын бодлогоор дэмжих, татварын энгийн, ойлгомжтой, тэгш шударга байх зарчмыг бүрэн утгаар нь хангасан, олон улсын жишигт нийцэхүйц оновчтой, тогтвортой орчинг бий болгох зайлшгүй шаардлагыг харгалзан Татварын ерөнхий хуулийн шинэчилсэн найруулгын төслийг боловсруулсан байна.

Э.Анхбаяр