Өргөдлийн байнгын хороо өнөөдөр хуралдаж, Засгийн газраас өнгөрөгч сарын 30-ны өдөр өргөн мэдүүлсэн “Монгол Улсыг 2026-2030 онд хөгжүүлэх таван жилийн үндсэн чиглэл батлах тухай” Улсын Их Хурлын тогтоолын төслийн анхны хэлэлцүүлгийг хийлээ. 

Иргэдээс ирүүлсэн санал, өргөдлийн дийлэнх нь, Эрүүл мэнд, Боловсрол, Эрчим хүчний салбарт хөрөнгө оруулалтыг тусгахад чиглэж  байна. Тиймээс ирэх таван жилийн Үндсэн чиглэлд эдгээр салбаруудад түлхүү анхаарах асуудлыг байнгын хороодын гишүүд хөндлөө. 

Улсын Их Хурлын гишүүн Г.Лувсанжамц бодлогын зорилт, тэргүүлэх чиглэлүүд болон тэдгээрт төлөвлөсөн төсөв, хөрөнгө оруулалт хоорондын уялдаа, нийцлийн тухай асуудлыг хөндөж, хөгжлийн бодлого, төлөвлөлтийн хэрэгжилт, түүний үр дагаварын үнэлгээг нарийвчлан тооцож, дүгнэж ажиллах шаардлагатай гэсэн юм. 

УИХ-ын гишүүн Х.Баасанжаргал боловсролын индексийг жилд дунджаар 0.01 пүнктээр, ирэх таван жилд нийтдээ 0.06 пүнктээр нэмэгдүүлэхээр төлөвлөсөн нь хангалтгүй байгааг дурдаад, шүүхийн салбарын хөрөнгө оруулалтыг 2030 он гэхэд 73.8 хувь хангахаар тусгасан нь 100 хувьд хүрэхгүй буюу эрэлтийг хангахгүйгээр төлөвлөгдсөнийг шүүмжилсэн юм. Мөн тэрбээр иргэдийн өргөдөл, гомдол бүрнээ шийдвэрлэгддэг байх зарчмыг таван жилийн үндсэн чиглэлд тусгаж, хэрэгжүүлэх учиртайг онцлов. 

Иргэдийн нийгмийн асуудлыг түлхүү тусгах, боловсролын тэгш хүртээмжийг сайжруулах, шүүхийн ил тод байдлыг дэмжих, хөрөнгө оруулалтуудыг зөв эрэмблэх, иргэдийн өргөдөл гомдлыг цаг тухайд нь шийдвэрлэдэг байх, төрийн бодлогод тусгуулах санал, асуултуудад ажлын хэсэг хариу тайлбар өглөө. 

Өргөдлийн байнгын хорооны санал, дүгнэлтийг Эдийн засгийн байнгын хороонд хүргүүлэх юм.