Хувь нийлүүлэгчдийн гэрээний үр дагавар 13.2 дах заалтын талаар тодруулсан асуултад "Оюутолгой" компанийн ТУЗ-ийн гишүүн асан Э.Баясгалан хариулт өглөө. 

Тэрээр хэлэхдээ, 2011 онд шинэчлэн тодотгосон хувь нийлүүлэгчдийн гэрээний 13.2 дах заалт бол зээлээ төлж байж ногдол ашгийг хуваарилна гэх агуулгатай.  

Бид ногдол ашгаа авч чадах уу, зээлээ төлж байж авах уу гэдэг асуулт бодит байдал болчхоод байна. 2025 оны эцсийн байдлаар Оюутолгой компани нийт 20 тэрбум долларын зээл болон санхүүжилтийн өглөгтэй байна. 20 тэрбумын зээл ирээдүйд бодогдох хүүгийн хамт эргэн төлөгдөж байж компани ногдол ашиг олгоно. Бизнесийн зарчмаар бодоод үзэхэд энэ заал асуудалтай. Учир нь хувь нийлүүлэгчид хоорондоо гэрээ тохирч бүгдээрээ бүх зээлээ эргэн төлж байж ногдол ашгаа өгнө.Энэ нь ямар ч компанийн хувь эзэмшигчид ийм зарчим байдаггүй. 

Хоёр хувьцаа эзэмшигч яагаад ийм заалтыг гэрээндээ оруулсан гэвэл зээлдүүлэгч нь өөрөө нэг хувьцаа эзэмшигч байсан буюу өөртөө давуу эрх үүсгэсэн. Аль аль нь ногдол ашиг авах сонирхолтой боловч нэг нь зээлдүүлэгч болж давхар хариуцлага үүрч өөрсдийн өгсөн зээлээ буцааж авахаар болсон гэв.

ТУЗ дээр санхүүжилт, хүүгийн дарамт их хэмжээгээр нэмэгдэж байна гэх асуудлыг миний бие 2020 онд ТУЗ-ын гишүүнээр томилогдсоноосоо хойш үеийн үед хэлж ирсэн. Бүх өр зээлээ төлж байж Монгол улс ногдол ашиг авна гэдэг заалт бизнесийн зарчимд нийцэхгүй байна гэх шаардлагыг тавьсан ч Оюутолгойн менежмент Рио Тинтогоос томилогддог учир стратеги ч боловсруулаагүй.