"Эрэл групп"-ийн ерөнхийлөгч Б.Эрдэнэбатын гэрт 14 жилийн өмнө амиа алдсан Филиппин улсын иргэн Террил Атиенза агсны нөхөр, хоёр охин өнөөдөр Монголд ирээд байна. Түүний нөхөр хэвлэлийн бага хурлын үеэр дараах үгийг хэлэв.

Тэрээр “Дөрвөн хүүхдийнхээ төлөө би сэтгэлийн асар их зовлонтойгоор олон цаг ажиллан цусаар бөөлжижтуйлдсан. Гэхдээ хүүхдүүдийнхээ өмнө, тэднийхээ төлөө хүчтэй байх ёстой учраас би тэсэж ирсэн.

Тэд бидэнд эхнэрийг минь амиа хорлосон гэж итгүүлэхийг оролдсон. Манай гэр бүлд амиа хорлохоор асуудал огт байгаагүй. Тиймээс бид тэдний үгэнд итгэлгүй, цогцсыг авчирч, нүдээр үзсэн.  Эхнэрийн минь бие аймшигтай болсон байлаа. Тиймээс задлан шинжилгээг албан ёсоор дахин хийлгэснээр тэд эхнэрийн минь зүрхийг авсныг мэдсэн.

Эхнэрийнхээ зүрхийг олж авбал миний сэтгэл амарна. Тэд миний эхнэрт яг л амьтан шиг хандаж, эрхтнийг нь авсан.

Харь орны хүмүүс биднийг халуун сэтгэлээр хүлээн авч байгаа Монголын ард түмэнд баярлалаа. Бид Монголд мөнгөний төлөө ирээгүй. Зөвхөн шударга үнэнийг мэдэхийн тулд ирсэн. Монголын Засгийн газар энэ хэргийг үнэн зөвөөр шийднэ гэдэгт итгэж байна гэв.