Засгийн газрын ээлжит хурлаас гарсан шийдвэрийн талаар Дулааны гуравдугаар цахилгаан станцад БЭТ-өөр томилогдсон Н.Тавинбэх танилцууллаа.

Тэрбээр "Энэ оны зургаадугаар сард ДЦС-3-т осол гарсан. Үүнийг хэвийн ажиллагаанд оруулах, сэргээн босголтын хүрээнд таван багц ажил хийж байна. Гурвыг нь энэ өвлийн их ачааллаас өмнө дуусгах ёстой. Өнөөдрийн байдлаар 90 орчим хувьтай байна. 

Энэ ажлуудыг бүрэн хийж дуусвал уг станц дулааны үйлдвэрлэлийг өнгөрсөн оны оргил үед үйлдвэрлэж байсан хэмжээнд, цахилгааныг өнгөрсөн онд үйлдвэрлэж байсны 50 орчимд хувьд нь үйлдвэрлэх техникийн боломжтой болно.

Үлдсэн хоёр ажлыг ирэх оны өвлийн их ачааллаас өмнө хийнэ гэж төлөвлөж буй. Энэ нь шинэ тоног төхөөрөмж үйлдвэрлэх, тээвэрлэх, барилга угсралтын хугацааг үндэслэн тооцоолсон цаг хугацаа.

Цахилгааны хувьд дутаж буй 50 хувийг шинэ эх үүсвэрээс хангахаар ажиллаж байна.

Сэргээн босголтын ажилд улсын төсвөөс 105 тэрбум төгрөг тавьсан. 

Сэргээн босголтын хөрөнгө оруулалтын зардал 330 мянга орчим доллар. Олон улсын жишиг, Монгол Улсад сүүлийн үед хийгдэж буй хөрөнгө оруулалтуудын нэгжийн зардал, нэг мВт-д оруулах хөрөнгө оруулалтын зардал 2.5-2.8 сая доллар байдаг. Тэгэхээр маш хямд өртгөөр сэргээн босголт хийж байна гэж ойлгож болно.

Миний хувьд БЭТ-ийн хувиар 2026 оны төсөвт дараагийн турбин генераторыг шинэчлэх зардлыг тусгаж өгөөч гэдэг хүсэлтийг Засгийн газар, Ерөнхий сайдад тавьсан. Ерөнхий сайд холбогдох сайдуудад үүрэг болголоо. Тооцооллоор энэ ажилд 30-50 тэрбум төгрөг шаардлагатай" гэв.