УИХ-ын чуулганы баасан гаригийн нэгдсэн чуулганаар Монгол Улсаас гадаад улсад суугаа зарим Элчин сайдыг томилох, чөлөөлөх асуудлыг хэлэлцлээ. БНХАУ-д Улсад суух Элчин сайдаар Д.Ганхуяг, БНАСАУ-д суух Элчин сайдаар С.Цоггэрэл, Унгар улсад суух Элчин сайдаар З.Батбаяр, Бүгд найрадах Итали улсад суух Элчин сайдаар Ц.Жамбалдоржийг томилох саналыг Гадаад хэргийн сайд Л.Пүрэвсүрэн орууллаа.

УИХ-ын гишүүд гадаадад улс орноо төлөөлж буй Элчин сайдуудыг намын харъяалал харгалзахгүй мэргэжлийн ур чадвартай хүмүүсийг томилохыг анхаарууллаа.

УИХ-ын гишүүн Ч.Хүрэлбаатар:  Гадаад хэргийн яамны Төрийн нарийн бичгийн Д.Ганхуяг энэ албан тушаалыг хашаад зургаан сар болж байна. Мөн АСЕМ-д бэлтгэх комиссын даргаар ажиллаж байгаа хүнийг Хятадад суух Элчин сайдаар томилох гэж байна.

Энэ хүнийг явахад АСЕМ-ийн ажил юу болох вэ. АСЕМ-ийг дуусгаад энэ хүнийг томилох асуудлаа ярьж болдоггүй юм уу? Ер нь Ардчилсан намынхан хүнийг албан тушаалд томилохдоо бүрэн эрхийн хугацааг нь дуустал ажиллуулж байгаач ээ. Санхүүгийн зохицуулах хорооны даргыг мөн нэг жилийн дараа ажлаас чөлөөллөө гэв.

Гадаад хэргийн сайд Л.Пүрэвсүрэн: Олон Улсын венийн конвенцийн дагуу Элчин сайдуудын УИХ-аар дэмжсэний дараа нөгөө талаас зөвшөөрөл авахад хугацаа хэрэгтэй байдаг. Тэгэхээр явах хугацаа наймдугаар сар болно. Д.Ганхуяг АСЕМ-ийн ажлаа дуусгаад явна. Бусад Элчин сайд ч 4-5 сарын дараа явах юм гэж хариулав.

Гишүүд асуулт тавьж, хариулт авсны дараа Монгол Улсаас БНХАУ-д суугаа Онц бөгөөд Бүрэн Эрхт Элчин сайд Ц.Сүхбаатар, БНАСАУ-д суугаа Элчин сайд М.Ганболд, Унгар улсад суугаа Элчин сайд Т.Ганди, Итали Улсад суугаа Элчин сайд Ш.Одонбаатар нарыг эгүүлэн татах санал хураалт явуулахад гишүүдийн олонх нь дэмжлээ.

Ингээд шинээр томилогдох Элчин сайдуудыг дэмжих тухай саналыг тус бүрт нь явуулахад гишүүдийн олонх нь дэмжиж, Элчин сайдаар томилогдлоо.