Зарим эх сурвалжид 1903, харин заримд нь 1909 онд анх Богд Хааны ордонд кино гаргасан тухай бичиж үлдээжээ. Ингэж анх Монголчууд бид кино урлагтай танилцаж, дэлхийн түүх, дэлхийн соёлыг мэдэж авах их аяныг эхлүүлсэн гэдэг.

Яг үүнтэй адил бид ч гэсэн өөрсдийн гэснийг харуулж дэлхийд танигдана

Дуу, дүрсний хослол нийлээд найруулагч, зохиолч, цаашлаад тухайн үйл явдлын учир холбогдол, бүр ард түмнийг илэрхийлэх чадалтай. Тийм ч учраас гаднын ертөнцтэй киногоор танилцсан бидэнд киногоор дамжуулан өөрсдийгөө танилцуулах үүрэг ноогдсон.

Жишээ нь найруулагч Д.Бямбасүрэнгийн “Ингэн нулимс”, “Шар нохойн там” зэрэг бүтээлүүд яах аргагүй бидний соёлыг, манай ард түмнийг гаднын ертөнцөд илэрхийлэх гүүр болсон гэдгийг бид мэднэ.

Тэгвэл “Монгол агуулгыг дэлхийд” уриатай Монгол Контент компани арван жилийнхээ ойг тохиолдуулан "Монгол Кино" төслийг хэрэгжүүлэхээр төлөвлөжээ. 

Монгол Контент ХХК-ийн “Монгол кино” төслийн удирдагч З.Отгонтуяа:

"Бид Ankhnyam Casting Agency, HERO entertainment, жүжигчин Б.Амарсайхантай хамтран 2016 онд Монгол ахуй соёлыг харуулсан, Монгол тодотголтой шинэ дэлгэцийн бүтээл гаргахаар болсондоо баяртай байна" гэсэн юм.

Жүжигчин Б.Амарсайхан “Дэлхийн кино урлагийн салбарт гарахын тулд өөрсдийн өв соёлыг харуулсан бүтээлээр л өрсөлдөх нь хамгийн чухал. Бидний мэдэж байгаачлан Япончууд, Солонгосчууд, Хятадууд өөрсдийн бие хамгаалах урлагаар дэлхийд танигдсан. Яг үүнтэй адил бид ч гэсэн өөрсдийн гэснийг харуулж дэлхийд танигдана” гэсэн юм.

Монголын хаад ноёд, Монголын ахуй амьдрал гээд өөр хаана ч биш, зөвхөн энд байгаа зүйлсийг бид кино урлагийн салбарт дэлгэрүүлэх нь энэ салбарт оруулах хамгийн том хөрөнгө оруулалт билээ.

Харин жүжигчин Р.Анхням “Ирэх арван жил ойрхон байна гэж би харж байна. Монгол Контент, Ankhnyam Casting Agency нэгдээд Монголыг дэлхийн хэмжээнд харуулах бүтээл гаргана гэж найдаж байна” гэсэн юм.