Энэтхэг улсын Ерөнхий сайд Нарендра Модигийн Зүүн Азийн БНХАУ, Монгол, Өмнөд Солонгос гэсэн улсад хийсэн айлчлал өчигдөр /05.19/ өндөрлөлөө.

Бээжинд хийсэн айлчлалын явцад Моди болон Си Зиньпин нар боловсрол, сансар судлал, аялал жуулчлал, байгалийн баялаг олборлох салбарын Засгийн газар хоорондын 24 гэрээнд гарын үсэг зуржээ. Түүнчлэн Энэтхэгийн Ерөнхий сайд Хятадын тэргүүлэх компаниудын дарга нартай уулзан 22 тэрбум ам.долларын 21 гэрээнд гарын үсэг зурсан байна.

Модигийн Бээжинд хийсэн айлчлалын амжилттай бас нэгэн гэрээ нь эдийн засгийн асуудал дээр Энэтхэг, Хятадын хамтарсан ажлын хэсэг байгуулах шийдвэр гэж олон улсын шинжээчид нэрлэж байна. Учир нь Энэтхэгийн гадаад худалдааны алдагдал 40 тэрбум ам.долларт хүрсэн бөгөөд дээрх ажлын хэсэг энэ мэт асуудлуудад гол анхаарлаа хандуулах юм.

Харин БНСУ-д хийсэн айлчлалын үеэр хоёр орны Засгийн газар хоорондын долоон гэрээнд гарын үсэг зурж, хөлөг онгоц бүтээн байгуулах хамтарсан ажлын хэсэг байгуулахаар зөвшилцөв. Түүнчлэн Өмнөд Солонгосын талаас Энэтхэгийн томоохон төслүүдэд 10 тэрбум ам.долларын хөрөнгө оруулалт хийхэд бэлэн буйгаа зарласан байна.

Үүнээс гадна Өмнөд Солонгос, Энэтхэг улсууд 2x2 хэлэлцээ хийж эхлэх тохиролцоонд хүрчээ. Энэ нь хоёр орны Батлан ​​хамгаалах болон Гадаад хэргийн сайд нарын уулзалт юм. Үүнээс өмнө Энэтхэг улс ийм хэлбэрийн уулзалтыг зөвхөн Японтой хийдэг байжээ.

Нарендра Модигийн Зүүн Азийн орнуудад хийсэн айлчлалын хамгийн анхаарал татсан нь Монголд хийсэн айлчлал байлаа. Энэхүү мэдэгдлийг Делигийн их сургуулийн Зүүн Азийн орнууд судлалын тэнхимийн профессор Равни Тхакур хэллээ.

Энэ бүс нутагт Энэтхэг, Хятадын хооронд өрсөлдөөн бий болж байгаа. Өмнө нь Зүүн Азийн бүс нутагт Хятад ноёлох хандлагатай байсан бол одоо Энэтхэг улс энэхүү нөхцөл байдлыг өөрчлөхөөр Зүүн Ази дахь байр сууриа бэхжүүлэхээр хичээж байна хэмээн Нарендра Модигийн айлчлалыг шинжээчид дүгнэв.

Эх сурвалж: РИА Новости