Өчигдөр засгийн газрын гишүүд хаалттай хуралдсан. Энэ үеэр Оюутолгой компанитай байгуулах Эвлэрлийн гэрээний асуудлыг хөндлөө гэх албан бус мэдээлэл өнөөдөр гарсан. Иймд Оюутолгой ХХК-ийн ТУЗ-ийн гишүүн, “Эрдэнэс Оюутолгой” компанийн гүйцэтгэх захирал Д.Ганболдоос тодруулга авлаа.

-Эхлээд бүх хүнд хандан нэг зүйл хэлмээр байна. Саран дээрээс нэг хүн бууж ирээд биднийг буудах гэж байна гэвэл та итгэх үү? Эхлээд тийм юм байж болох уу гэдгээ бод л доо. Эвлэрлийн гэрээ гэж юу юм гэдгийг бод. Татварын маргаан байгаа бол тухайн компани татварын газартайгаа л учраа олдог болохоос биш Засгийн газар үүнд оролцдоггүй. Эвлэрлийн гэрээг өөр газар, өөр хүмүүс ярьдаг.  Засгийн газар ийм асуудлыг нээлттэй ч бай, хаалттай ч бай хэлэлцдэггүй.  Засгийн газар өчигдөр хуралдахдаа энэ асуудлыг хөндөөгүй. Оюутолгой ХХК болон Засгийн газар хооронд маргаан байгааг бүх монголчууд мэднэ.

-30 сая ам.долларыг тэглэх тухайд?

-Хоёр тал эвлэрч болно.  Хэдий шүүхэд өгсөн ч шүүхээс нэхэмжлэлээ буцаан татаж, талууд эвлэрч болно. Оюутолгой татвараа төлж л байна.