Эрүүл мэнд спортын сайд Г.Шийлэгдамба харьяа эмнэлэг, эрүүл мэндийн байгууллагуудынхаа удирдлагуудтай өчигдөр үр дүнгийн гэрээ байгууллаа.

Салбарын сайдын харьяанд Эрүүл мэндийн хөгжилийн төв, Улсын 1,2,3 дугаар төв эмнэлэг, ХӨСҮТ, ГССҮТ, ХСҮТ, СЭМҮТ, аймгуудын бүсийн оношилгоо эмчилгээний төвүүд зэрэг нийт 20 гаруй байгууллага үйл ажиллагаагаа тасралтгүй явуулж ард иргэддээ эрүүл мэндийн тусламж үйлчилгээг хүргэж байна.

Энэхүү гэрээнд үйл ажиллагаагаа оновчтой төлөвлөн хэрэгжүүлэх, ажлын байрны шаардалгад нийцүүлэн мэдлэг чадвараа дээшлүүлэх, төрийн албаны тухай хууль тогтоомж, стандарт, ёс зүйн хэм хэмжээг чанд сахиж, сонирхлын зөрчилгүй ажиллах, байгууллагынхаа ил тод байдлыг хангаж, төсвийн эд хөрөнгийг зохистой ашиглах, хүний нөөцийн чадавхийг бэхжүүлэх зэрэг манлайллын зорилтуудыг тусгасан байна.

Эрүүл мэнд, спортын сайд “Өнөөдрийн нийгэм эдийн засгийн нөхцөл байдал хүнд, салбарт тулгамдсан олон асуудал байгаа хэдий ч нөгөө талаар ард иргэдийн дунд, эрүүл мэндийн тусламж үйлчилгээг чанартай хүртээмжтэй хүргэх, эрүүл мэндийн засаглалын шинэчлэл зэрэг асар их хүлээлт байна. Энэ эгзэгтэй цаг үед халаа сэлгээ улс төржилтөөр биш, хамтарч ажиллаж асуудлыг давж туулья” гэж хэллээ.

Тэрбээр эрүүл мэндийн салбарт улс төржилт халаа сэлгээ байх ёсгүй. Тасралгүй чанартай явагдах эрүүл мэндийн тусламж үйлчилгээний хариуцлагыг та бүхнээс хүлээж байна хэмээн эмнэлгийн дарга нартаа анхааруулав.