Манай улсын хүн амын өсөлт, төвлөрөл, эдийн засаг, нийгмийн хөгжлийн хэрээр дулаан, цахилгааны эрчим хүчний хэрэглээ үлэмж нэмэгдэж байна.  

Иймд ДЦС-3 ТӨХК-ийг үе шаттай шинэчилж, Улаанбаатар хотын өсөн нэмэгдэж байгаа цахилгаан, дулааны эрчим хүчний хэрэглээг хангах, тасралтгүй, найдвартай ажиллах, зах зээлд өрсөлдөх чадвартай, өндөр хүчин чадалтай станц болгох зорилгоор “Дулааны III  цахилгаан станц” ТӨХК-ны суурилагдсан хүчин чадлыг  50 МВт-аар өргөтгөхөөр шийдвэрлэсэн.

Төслийн ажлын гүйцэтгэгчээр БНХАУ-ын “Hunan Industrial Equipment Installation” компани шалгарч, “2014 оны 06-р сарын 15-ны өдөр Түлхүүр гардуулах” нөхцлөөр гэрээ байгуулж, төслийн ажлаа 2013.07.15-ны өдрөөс эхэлсэн юм.  

Чингис бондын хөрөнгө оруулалтаар Хөгжлийн банкны З5 сая ам.долларын санхүүжилтээр  хэрэгжиж байгаа энэ төслийн хүрээнд

-Үндсэн барилгыг өргөтгөх,
-Хөргөлтийн цамхаг, эргэлтийн усны төхөөрөмж шинээр барих 50 МВт-ын турбин-генератор шинээр суурилуулах,
-Цахилгаан хуваарилах байгууламж, трансформатор суурилуулах,
-Дулааны сүлжээний ус халаах байгууламж барих болон бусад тоноглолын барилга угсралтын ажлууд дууссан байна.  

Иймд өчигдөр Эрчим хүчний дэд сайд Д.Доржпүрэв, ЭХЯ-ны холбогдох газар хэлтсийн дарга нар, Диспетчирийн үндэсний төвийн удирдлага, Мэргэжлийн хяналтын ерөнхий газрын эрчим хүч хариуцсан мэргэжилтнүүд төслийн явцтай газар дээр нь танилцжээ. Тэд 50 МВт-ын турбин-генераторыг асааж, туршилт тохируулгын ажлыг эхлүүлсэн юм.

“ДЦС-3” ТӨХК-ын суурилагдсан хүчин чадлыг 50 МВт-аар өргөтгөснөөр Төвийн бүсийн эрчим хүчний системийн хүчин чадал 50 МВт-аар, Улаанбаатар хотын дулаан хангамжийн системийн хүчин чадал 100Гкал/ц-аар нэмэгдсэн.

Ингэснээр Багануур дүүргийн орон сууцны хороололд оршин суудаг айл өрхийн хэмжээнд дулааны эрчим хүчээр хангах боломж бүрдэх юм.

Суурилуулсан тоног төхөөрөмжтэй ажиллах инженер техникийн ажилтнуудыг богино хугацаанд сургах дадлагажуулах шаардлага бий. Гүйцэтгэгч компани  БНХАУ-ын “Hunan Industrial Equipment Installation” компанитай хамтран богино хугацааны дадлага сургалтыг Хятадын ижил төрлийн ДЦС дээр зохион байгуулахыг дэд сайд Д.Доржпүрэв хүссэн.  

ДЦС-3 ТӨХК-ын суурилагдсан хүчин чадлыг 50 МВт-аар өргөтгөлийг албан ёсоор хүлээн авах ёслол энэ сарын 16-нд болох юм.