Нэгдүгээр төрөх эмнэлэгт амаржсан ээжийг гадуур хувцасгүй, гэрийн углааштай нь ХӨСҮТ рүү шилжүүлж хүйтэн сэтгэлээр хандсанд бухимдсан иргэд УОК-ын дарга Я.Содбаатар, Эрүүл мэндийн сайд Т.Мөнхсайхан нарыг огцрохыг шаардаж Төв талбайд жагсаж байна.

Энэ асуудлаар Ерөнхий сайд У.Хүрэлсүх холбогдох албаныхныг байлцуулан хуралдаж байгаа бөгөөд Ерөнхий сайд "Бүх шатны ажил хариуцсан хүмүүст хариуцлага тооцно" хэмээн мэдэгджээ. Хурлаас гаргасан шийдвэрээ одоо 19.00 цагт олон нийтэд танилцуулна гэж ЗГ-ын Хэвлэл мэдээллийн албаны дарга Ц.Ганзориг мэдээлэв.

УОК-ын дарга Я.Содбаатар: Үүссэн нөхцөл байдалтай холбоотойгоор УОК-ын удирдлага огцорч байна. Өчигдрийн үйл явдалд гүнээ харамсаж чинь сэтгэлээсээ мэдэгдэл гаргасан юм. Шууд миний хариуцаж байсан асуудал биш ч гэлээ хүнлэг бус, сэтгэлгүй хүмүүс Монголын төрд цөөн ч гэсэн байгаад бас харамсаж байна. Хариуцлагатай албанд томилсон Монгол Улсын Ерөнхий сайд, нийт ард иргэдээсээ уучлалт хүсэж байна. Хариуцсан салбар, даалгасан чинь сэтгэлээсээ Монголын төрд хоёргүй сэтгэлээр зүтгэж гүйцэтгэлээ. Цар тахлыг дотооддоо алдаагүй 10 сарыг өнгөрөөсөн. Үүний 5 сар нь шинэ Засгийн газрын ажил байсан. Алдаатай оноотой ч коронавирусийн халдварын эсрэг тэмцсэн миний болон манай багийн тэмцэл нөхдийн ажил зүтгэл стратегийн том алдаа гаргаагүй гэдгийг цохон тэмдэглэе. Бид дэлхийд цар тахалтай хамгийн амжилттай тэмцэж буй 5 орны нэгээр нэрлэгдэж буй. Коронавирусээр нэг ч хүн нас бараагүй. Тун удахгүй бүх нийтийн дархлаажуулалтын ажлыг эхлүүлнэ. Нэг ёсондоо бид ковид-19-тэй хийх тэмцэлд очих цэгээ харж байсан юм. 

Энэ хүнд цаг үед ажиллаж буй эмч, мэргэжилтэн, онцгой, цагдаа, мэргэжлийн хяналт, хүчнийхэн, аймаг нийслэлийн онцгой байдлын нийт бие бүрэлдэхүүнд, Монгол Улсын Засгийн газар, УИХ-д хамтран ажилласан явдалд талархал илэрхийлье. УОК-ын даргын хувьд Шадар сайдын ажлаасаа огцрох өргөдлөө Ерөнхий сайд У.Хүрэлсүхэд хуулийн дагуу өнөөдөр хүргүүлнэ. Дахин хэлэхэд нийт ард иргэдээсээ уучлалт хүсэж байна.