Сүмо бөхийн дээд зиндааны тавдугаар сарын тэмцээн буюу Нацү башё тавдугаар сарын 28-д өндөрлөсөн. Тус тэмцээнд Монголын найман бөх зодоглосноос идэвхтэй барилдаж буй цорын ганц ёкозүна (аварга) Тэрүнофүжи Г.Ган-Эрдэнэ найм дахь удаагаа түрүүлсэн билээ.

Тэгвэл тус башёг 11 даваа 4 унаатай дуусгаж тэргүүлэгчдийн эгнээнд багтсан сэкивакэ (Сүмогийн гурав дахь том цол) Кирибаяма Б.Лхагвасүрэн дараагийн тэмцээнд озэки цол руу дэвшин барилдахаар болсон юм.

Түүнийг тавдугаар сарын 31-ний Сүмогийн холбооны хурлаар озэки цолд албан ёсоор батламжилсан бөгөөд Нагоя башёгоос эхлэн дэвжээний нэрээ Киришима хэмээн өөрчилж байна.

Озэки цол нь сүмогийн дээд зиндааны хоёр дахь том цол бөгөөд сүүлийн гурван тэмцээн дараалан 33-аас олон даваа авсан сэкивакэ уг цолын болзлыг хангадаг. Харин нэгдүгээр сард комүсүби цолтой, түүний дараагийн хоёр тэмцээнд сэкивакэ цолтой барилдсан Кирибаяма 34 давснаар энэ болзлыг хангасан.

Сүмогийн дээд зиндаанд одоогоор озэки цолтой нэг бөх байгаа нь барууны манлай Такакэйшо юм. Харин ирэх долоодугаар сарын тэмцээн буюу Нагоя башёд хоёр озэки барилдах нь тодорхой боллоо.

Кирибаяма Тэцүо буюу Бямбачулууны Лхагвасүрэн нь 1996 оны дөрөвдүгээр сарын 24-д Дорнод аймагт төржээ. 17 насандаа Улаанбаатарт ирсэн тэрээр анх үндэсний бөх болон жүдогоор хичээллэдэг байв. Улмаар 2014 онд урилгаар Мичинокү дэвжээнд сүмогоор хичээллэхээр арлын орныг зорьсон түүхтэй.

Лхагвасүрэн тухайн үед 180 см өндөр, 70 кг жинтэй байсан ба урилгаар Японд очсон бусад хөвгүүдээсээ илт илүү байсан гэж дэвжээний мастер Киришима ярьсан байна. Гэвч Мичинокү дэвжээ нь 2011 онд барилдаан наймаалцсан хэргээр хөөгдсөн Хакүбагаас хойш гадаадын сүмочтой байгаагүй тул Лхагвасүрэн 2015 онд Япон улсын иргэншил авчээ. Улмаар тус оныхоо тавдугаар сард анх удаа сүмогийн дэвжээнд барилдсан байна.

Тэрээр мэргэжлийн тамирчин болохын тулд дөрвөн жилийг зарцуулсан бөгөөд 2019 оноос ёкозүна Какүрюү М.Анандын хамт Мичинокү дэвжээнд барилдаж эхэлсэн. М.Ананд аварга одоо тус дэвжээний дасгалжуулагчаар ажиллаж байна.

Дээд зиндаанд дэвшсэн эхний тэмцээндээ 11 даваа, 4 унаатай амжилтыг үзүүлж “Fighting Spirit” буюу тулаанч бөхийн шагналыг хүртсэн билээ.

2022 оны долоодугаар сараас хойш комүсүби цолтой барилдаж 2023 оны нэгдүгээр сард 11-4 амжилтыг дахин үзүүлснээр “Technique Prize” шагналыг хүртсэн тэрээр гуравдугаар сараас нь сэкивакэ цолтой барилдаж эхэлсэн юм. Сэкивакэ цолтойгоор барилдсан ердөө хоёр тэмцээний дараа озэки цолд хүрсэн тэрээр Монголын зургаа дахь озэки болсон төдийгүй Technique Prize шагналыг гурван тэмцээн дараалан хүртлээ.

Түүнийг тавдугаар сарын 31-ний Сүмогийн холбооны хурлаар озэки цолд албан ёсоор батламжилсан бөгөөд Нагоя башёгоос эхлэн дэвжээний нэрээ Киришима хэмээн өөрчилж байна. Энэ нь дэвжээний мастер озэки Киришимагийн нэрийг өвлөн авч буй хэрэг аж.

Энэ талаар Лхагвасүрэн “Би озэки цолоо хадгалахын тулд улам шаргуу хичээнэ. Сүмогоо орхиод Монгол руу буцах бодол цөөнгүй байсан. Одоо тэр хэцүү үеийг давсандаа баяртай байна” хэмээжээ.

Нагоя башё долоодугаар сарын 9-23-ны хооронд үргэлжилнэ.

Эх сурвалж: KyodoNews, Wikipedia, Sumo