Анхдугаар чуулган үргэлжилж байна.

АН-ын дарга Н.Алтанхуяг УИХ-ын даргад нэр дэвшигч З.Энхболдыг танилцуулсны дараа асуулт хариулт, санал хэлэх хугацаа үргэлжилсний дараа санал хураалт явагдаж дууслаа.

Өнөөдрийн УИХ-ын гишүүдийн ирц 60,9 хувь байгаагаас 95,2 хувь нь УИХ-ын даргад нэр дэвшигч З.Энхболдыг дэмжлээ. Ийнхүү Зандаахүүгийн Энхболд  зургаа дахь удаагийн УИХ-ын даргаар сонгогдлоо.

УИХ-ын даргад нэр дэвшигч Зандаахүүгийн Энхболд:
1966 оны 5 дугаар сарын 23-нд Улаанбаатар хотод төрсөн, эхнэр, охин, хоёр хүүтэй. Тэрбээр 1984 онд Сэлэнгэ аймгийн Сүхбаатар хотын 10 жилийн дунд сургууль, 1989 онд ОХУ-ын Уралын Политехникийн дээд сургуулийг төгссөн. Автоматик, телемеханикийн инженер мэргэжилтэй. 1996 онд Монгол Улсын Их сургуулийг эрх зүйч мэргэжлээр төгссөн. 2004 онд АНУ-ын Денверийн Их сургуульд Олон улсын Бизнесийн удирдлагын магистрын зэрэг хамгаалсан. Англи, орос хэлтэй.

1996-1999 онд Төрийн өмчийн хорооны дарга, 1999-2000 онд УИХ-ын даргын зөвлөх, 2000-2001 онд Ардчилсан намын Ерөнхий нарийн бичгийн дарга, 2004-2005 онд Төрийн өмчийн хорооны даргаар ажиллаж байсан. УИХ-ын Аюулгүй байдал, гадаад бодлогын байнгын хороо, Хууль зүйн байнгын хороонд харьяалагддаг. УИХ-ын Хүний эрхийн дэд хорооны гишүүн.

УИХ дахь  Монгол-Америк, Монгол-Орос, Монгол-Сингапур, Монгол-Хятад, Монгол-Японы парламентын бүлгийн гишүүн. Түүний хөдөлмөр, зүтгэлийг төр, засгаас үнэлэн Хөдөлмөрийн гавьяаны улаан тугийн одон, Их Монгол Улс байгуулагдсаны 800 жилийн ойн хүндэт медалиар тус тус шагнажээ.

Яг одоо УИХ-ын тамгыг залж, хурал даргалагч Л.Цог УИХ-ын шинэ дарга З.Энхболдын ажилд амжилт хүссэний дараа түүнд тамгыг гардууллаа.

М.Жаргал, Гэрэл зургийг Б.Бямба-Очир