• Монголын Сагсан бөмбөгийн шигшээ баг бэлтгэлтээ гарна
• Тэд Азийн аваргын урьдчилсан шатны эхний тоглолтоо энэ сарын 22-д хийнэ

Монголын сагсан бөмбөгийн үндэсний шигшээ баг маргаашаас буюу хоёрдугаар сарын 14-өөс нэгдсэн бэлтгэлдээ гарахаар болсон байна.

Тодруулбал, Олон Улсын сагсан бөмбөгийн холбооноос зохион байгуулдаг Азийн 2025 оны аварга шалгуулах тэмцээний урьдчилсан шатанд Монголын шигшээ баг анх удаа шалгарсан билээ.

Урьдчилсан шатны "С" хэсэгт Хятад, Гуам, Японы шигшээ багтай таарсан Монголын шигшээ баг эхний тоглолтоо хоёрдугаар сарын 22-д Хятадын талбайд хийнэ. Үргэлжлүүлэн хоёрдугаар сарын 25-д нутагтаа Гуамын шигшээ багийг хүлээн авч тоглоно.

• Б.Болдбаатарын дээд лигт тоглох эрхийг 2026 он хүртэл хаслаа
• Үндэсний дээд лигийн улирлын MVP-ээр М.Өлзий-Орших, Ө.Индра нар тодорлоо
• ХОЁРДУГААР САРЫН СПОРТ: Жүдо, CS2-ын их дуулга тэмцээнүүд болно

Тэгвэл тус чухал тоглолтуудад бэлтгэхээр нэгдсэн бэлтгэлийг долоо хоногийн өмнөөс эхлүүлж байна. Шигшээ баг бэлтгэлээ UG Arena-д хийх бөгөөд одоогоор дасгалжуулагчийн баг ямар тоглогчдыг авч явахаа эцэслээгүй байгаа аж. "Гэхдээ өнгөрсөн жил тоглож байсан багийн гол цөм болсон тоглогчид багтаж" байгааг холбооны хэвлэлийн төлөөлөгч мэдээлсэн юм.

Шигшээ баг цугларсан энэ үед Үндэсний дээд лигийн тоглолтууд завсарлана. Одоогоор Үндэсний эрэгтэй дээд лигийн Play-off-ын хагас шигшээ шат үргэлжилж байгаа бөгөөд Бишрэлт Металл 2-1 IHC Apes, Хасын Хүлэгүүд 1-0 Erdenet Miners харьцаатай үргэлжилж байна.

Монголын шигшээ баг урьдчилсан шатанд тоглохын тулд, сонгон шалгаруулалтын нэгдүгээр шатанд Малайз, Тайланд, Вьетнам, Таитийн багуудтай тоглож 2-р байраар хоёрдугаар шатанд шалгарсан. Улмаар хоёрдугаар шатанд Малайз, Тайландаас гадна Хонконг, Сингапур, Гуамын шигшээ багуудтай тоглож 3-р байраар урьдчилсан шатанд шалгарсан юм.

"FIBA Asia Cup 2025"-ын урьдчилсан шатанд нийт 24 баг дөрвөөрөө зургаан хэсэгт хуваагдаж байна. Баг тус бүр хэсгийн багуудтайгаа гэртээ болон талбайд нь ээлжилж тоглосноор нийт 6 тоглолтыг хийнэ. Хэсэг тус бүрээс хамгийн өндөр оноотой хоёр баг 2025 оны Азийн аваргад тоглох бол 3-р байрыг эзэлсэн зургаан баг нэмэлт шатны тоглолт хийж дөрөв нь Азийн аваргын эрхээ авах учиртай.

Азийн аваргын урьдчилсан шатанд Монголын шигшээ багаас гадна Арабын Нэгдсэн Эмират улс анх удаа оролцож байна.