Гадаад харилцааны сайд Б.Батцэцэг Бүгд Найрамдах Хорват Улсын Гадаад хэрэг, Европын сайд Гордан Грлич Радман нар өчигдөр албан ёсны хэлэлцээ хийлээ.

Талууд Монгол, Хорватын харилцаа, хамтын ажиллагааг өргөжүүлэх, ялангуяа худалдаа, эдийн засаг, аялал жуулчлал, боловсрол, соёлын салбарын хамтын ажиллагааг идэвхжүүлэх талаар дэлгэрэнгүй санал солилцов.

Гадаад харилцааны сайд Б.Батцэцэг Монгол Улсын урт хугацааны хөгжлийн бодлого, томоохон зорилтуудыг танилцуулж, “Тэрбум мод” үндэсний хөдөлгөөн, “Илгээлт-2100” тэтгэлэгт хөтөлбөрийг хэрэгжүүлэхэд Хорват Улстай хамтран ажиллах талаар ярилцлаа.

Түүнчлэн уур амьсгалын өөрчлөлт, цөлжилт, хөрсний доройтол, хүнсний аюулгүй байдал зэрэг дэлхий нийтийн өмнө тулгамдаж буй нийтлэг сорилтуудыг даван туулах, шийдвэрлэхэд олон талт хамтын ажиллагааг бэхжүүлэхийг чухлыг онцолж, энэ чиглэлд нягт хамтран ажиллахаар санал нэгдэв.

Энэхүү зорилтын хүрээнд 2026 онд тохиох “Олон улсын бэлчээр ба нүүдлийн мал аж ахуй эрхлэгчдийн олон улсын жил” болон ирэх жил Улаанбаатар хотноо зохион байгуулах Цөлжилттэй тэмцэх асуудлаарх НҮБ-ын конвенцын талуудын 17 дугаар бага хурлын хүрээнд хамтран ажиллах талаар ярилцав.

Монгол, Хорватын харилцааны гүүр болсон иргэд хоорондын солилцоог нэмэгдүүлэх, ялангуяа оюутан залуусыг хоёр улсад харилцан тэтгэлгээр суралцуулах хамтын ажиллагааг гүнзгийрүүлэхийн төлөө байгаагаа талууд нотлов.

Түүнчлэн НҮБ болон олон улсын бусад байгууллагын хүрээн дэх хамтын ажиллагааг бэхжүүлэхээ нотолж, олон улсын харилцааны зарим асуудлаар санал солилцов.

Бүгд Найрамдах Хорват Улсын Гадаад хэрэг, Европын сайд Гордан Грлич Радманы Монгол Улсад хийж буй албан ёсны айлчлалын хүрээнд хоёр талын хамтын ажиллагааны дараах баримт бичгүүдэд гарын үсэг зурав. Үүнд:

• “Олон улсад автозамаар ачаа, зорчигч тээвэрлэх тухай Монгол Улсын Засгийн газар болон Бүгд Найрамдах Хорват Улсын Засгийн газар хоорондын хэлэлцээр”, Хоёр улсын зам, тээврийн салбарын хамтын ажиллагааг хөгжүүлэх, тээвэр, логистикийн шинэ чиглэлийг бий болгох, иргэд болон бизнес эрхлэгч нарын харилцааг хөнгөвчилж, харилцан ашигтай худалдаа, эдийн засгийн хамтын ажиллагааг өргөжүүлэн хөгжүүлэх эрх зүйн орчныг бүрдүүлж буй чухал ач холбогдолтой.
• “Хамтран ажиллах тухай Монгол Улсын Гадаад харилцааны яам болон Хорват Улсын Гадаад хэрэг, Европын яам хоорондын Харилцан ойлголцлын санамж бичиг”, Олон улсын болон бүс нутгийн түвшинд хамтын ажиллагааг идэвхжүүлж, хоёр улсын дэвшүүлсэн санал санаачилгыг сурталчлан таниулж, харилцан дэмжлэг үзүүлэхээр тохиролцов.
• “Ойн салбарт хамтран ажиллах тухай Монгол Улсын Ойн газар болон Бүгд Найрамдах Хорват Улсын “Хорватын Ой” ХХК хоорондын харилцан ойлголцлын санамж бичиг”, Ойн салбарт тогтвортой, урт хугацааны хамтын ажиллагааг өрнүүлж, ойн аж ахуйн, ойн тогтвортой менежментийг хөгжүүлэхэд хамтарч ажиллана. Үүний хүрээнд цөлжилт, хөрсний доройтолтой тэмцэх зорилгоор мод тарих, ойжуулах, ойг нөхөн сэргээх арга зүйн харилцан туршлага солилцоно.
• #Монголын Үндэсний Худалдаа, аж үйлдвэрийн танхим, Хорватын Эдийн засгийн танхим хоорондын Харилцан ойлголцлын санамж бичиг”,
  

Танхим хоорондын харилцааг идэвхжүүлж, бизнес эрхлэгчид, баялаг бүтээгчдийн санал, санаачилгыг дэмжих, аж ахуйн нэгж хоорондын хамтын ажиллагааны таатай нөхцөлийг бүрдүүлж, яриа хэлэлцээг эрчимжүүлнэ гэж ГХЯ мэдээлэв.