ОХУ-ын -66кг-ийн шилдэг тамирчдын нэг, ДАШТ-ий хүрэл медальт, Европ тивийн анхдугаар наадмын аварга Камал Хан Магамедовоор удирдуулсан Бахрейны хаант улсын баг Улаанбаатарт хүрэлцэн ирлээ. Тайланд улсын Бангкок хотод зохиогдсон 2025 оны Ази тивийн аварга шалгаруулах тэмцээний -100кг-н аварга Сайд Садрудинов тэргүүтэй таван тамирчин манай их дуулгад өрсөлдөх юм.

Манай улсад гурав дахь удаагаа зохион байгуулагдах, дэлхийн чансааны оноо олгодог өндөр зэрэглэлийн “Улаанбаатар Их Дуулга 2025” олон улсын жүдо бөхийн тэмцээн энэ сарын 25-27-нд Улаанбаатарт болно.

30 гаруй улсаас 800 орчим жүдоч, дасгалжуулагч оролцохоор бүртгүүлжээ. Олон улсын энэхүү тэмцээн нь Монгол Улсын спортын хөгжилд бодит хувь нэмэр оруулахаас гадна залуусын оролцоог нэмэгдүүлэх, аялал жуулчлал, эдийн засгийн идэвхжилд эергээр нөлөөлөх өргөн цар хүрээтэй тэмцээн гэж Монголын жүдо бөхийн холбоо мэдээлэв.