Улсын Их Хурлын 2025 оны 62 дугаар тогтоолоор байгуулагдсан Оюутолгойн бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагаанд хяналт шалгалт хийх Улсын Их Хурлын хянан шалгах түр хороо өнөөдөр (2025.10.01) хуралдав.

Хуралдаан гишүүдийн 63.3 хувийн ирцтэйгээр 14 цаг 16 минутад эхэлж, зургаан асуудал хэлэлцэхээр тогтлоо.

Хуралдаанаар хэлэлцэх эхний гурван асуудал буюу “Хянан шалгагч томилж, ажлын даалгавар батлах тухай”, “Шинжээч томилох тухай”, “Ажлын хэсгийн бүрэлдэхүүнд өөрчлөлт оруулах тухай” тогтоолын төслүүд нь Хянан шалгах түр хорооны дотоод асуудал тул Монгол Улсын Их Хурлын чуулганы хуралдааны дэгийн тухай хуулийн 8 дугаар зүйлийн 8.3 дахь хэсгийг үндэслэн хуралдааныг хаалттай горимд шилжүүлэх саналыг О.Батнайрамдал дарга гаргав.

Энэ дагуу санал хураалт явуулахад гишүүдийн 85.7 хувь нь дэмжсэн тул хуралдаан хаалттай горимд шилжсэн.

Холбогдох асуудлуудаа хаалттай горимоор хэлэлцэн шийдвэрлэсний дараа Хянан шалгах түр хорооны хуралдаан үргэлжилж, “Нотлох баримт цуглуулах тухай” Түр хорооны тогтоолын төслийг хэлэлцэв. Оюутолгойн бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагааг хянах сэдвийн хүрээнд Төрийн өмчийн бодлого, зохицуулалтын газраас нотлох баримтуудыг гаргуулна. 

Үүнтэй холбоотой зохицуулалтыг тусгасан талаар О.Батнайрамдал дарга танилцууллаа. Хуралдаанд оролцсон гишүүд дээрх танилцуулгатай холбогдуулан асуулт асуух, санал хэлэх шаардлагагүй хэмээн үзсэн тул батлах санал хураалт явууллаа. Гишүүд 85.7 хувийн саналаар дэмжсэнээр “Нотлох баримт цуглуулах тухай” Түр хорооны тогтоол батлагдлаа.

Эх сурвалж: parliament.mn