Нийслэлд энэ онд нийт 167 мянган м.кв явган зам талбайг шинэчлэхээр төлөвлөсөн. Өнөөдрийн байдлаар 102 мянган м.кв зам шинэчлэгдэж, ажлын гүйцэтгэл 55 хувьтай байна.

Энэ амралтын өдрөөр НЗД-ын нэгдүгээр орлогч Т.Даваадалай болон холбогдох албаныхан Сонгинохайрхан дүүргийн 15 дугаар хороо, Хархорин захын орчмын ажлын явцыг шалгажээ.

Нийслэлийн хэмжээнд 13 байршилд 12 аж ахуйн нэгж явган замын шинэчлэл хийж байгаа аж. Үүнээс гурван байгууллага ажлаа бүрэн дуусгаж, улсын комисст хүлээлгэн өгсөн бол үлдсэн 10 байршилд ажил үргэлжилж байгаа бөгөөд Их, Бага тойруугийн замын ажил удаашралтай байгааг албаныхан хэлж байна.

Хархорин захын орчимд явган хүний замын шинэчлэл 86 хувьтай үргэлжилж байгаа гүйцэтгэгчээр “Бадрах инженеринг” компани ажиллаж байна. Тус компани 16 хүний бүрэлдэхүүнтэй ажиллаж, ирэх сарын 15-нд ажлаа дуусгахаар төлөвлөжээ.

Энэ үеэр НЗД-ын нэгдүгээр орлогч гүйцэтгэгч компаниуд болох “Бадрах инженеринг”, “Төрөлх мөрөн”, “Тасо” ХХК-д хариуцсан замын ажлаа чанартай хийж, хугацаанд нь дуусгахыг санууллаа.