Монгол Улсын 2026 оны нэгдсэн төсвийн төслийг танилцуулж байна. Энэ үеэр Сангийн сайд Б.Жавхлан мэдээлэл өглөө.

Тэрбээр "Ирэх жилд 90 сая тонн нүүрс экспортолно. Бидний нэвтрэн өнгөрүүлэх чадвар болон БНХАУ-ын зах зээлийн хүлээж авах эрэлт хэрэгцээг харьцуулбал энэ байтугай боломж бидэнд бий.

Хятадын нүүрсний жилийн хэрэгцээ дор хаяж 5 тэрбум. Үнийн хувьд хамгийн бага буюу 70 ам.доллароор тооцсон. Энэ жилийн хувьд гүйцэтгэл 85 сая тонны зорилттой. Одоогоор энэ үзүүлэлтэд тун дөхсөн байгаа. Иймд ирэх жилийн 90 сая тонн нүүрс гэдэг хамгийн багадаа гэж ойлгох хэрэгтэй" гэв. 

Танилцуулгын эхэнд Ерөнхий сайд Г.Занданшатар "Татварын ачааллыг бууруулсан, тэр хэмжээгээр хувийн хэвшилдээ илүү орон зай олгосон төсөв боллоо" хэмээн мэдээлсэн. 

Энэ талаар Сангийн сайд "Энэ удаагийн төсвийн хамгийн том зорилго нь хувийн хэвшилд очих татварын дарамтыг буулгах. Ингэснээр эдийн засгийн өсөлтийг дэмжинэ. Төр, хувийн хэвшлийн түншлэл гэсэн хэлбэрээр бид цааш хөгжинө. 

Ирэх жилийн төсвийг алдагдалгүй гэж тооцсон. Өөрөөр хэлбэл төсвөө танаад эдийн засгийн өсөлтөө хадгална. Зөрүү нь тэлж буй орон зайг хувийн хэвшилд санал болгож байна" гэв.