Хичээлийн шинэ жил эхэлж, авто замын түгжрэл нэмэгдэхтэй холбогдуулан НИТХ-ын дарга А.Баярын захирамжаар нийслэлийн гол замуудын нэгдүгээр эгнээг нийтийн тээврийн хөдөлгөөнд зориулан чөлөөлж эхэлсэн.

Энхтайваны өргөн чөлөөнд эхлүүлсэн зохицуулалтын үр дүнд автобусны хүлээлгийн хугацаа 8-10 минутаас 3-5 минут болж багасжээ. Мөн автобусны хурд 4.5 км/цаг нэмэгдэж, дундаж хурд 13.5 км/цаг болж өссөн байна.

Тухайлбал, М:1 чиглэлийн Таван шараас Офицеруудын ордон орох чиглэлийн автобусны хурд өмнө нь 110 минут байсан бол одоо 90 минут болж буурсан байна. Түүнчлэн Замын цагдаагийн газраас нэгдүгээр эгнээгээр автобус саадгүй зорчих болсноор томоохон уулзваруудад зохицуулалт хийх замын цагдаагийн ачаалал эрс буурчээ.

НИТХ-ын дарга А.Баяр хэлэхдээ, Нийслэлийн иргэд хүссэн газраасаа зорьсон цагтаа автобусаар саадгүй зорчдог болгох үүднээс шат дараатай ажлуудыг хийж байна. Эхний ээлжид Таван шараас Офицеруудын ордон хүртэлх авто замын нэгдүгээр эгнээг чөлөөлж нийтийн тээврийн автобус бүрэн зорчих нөхцөлийг бүрдүүлээд байна.

Дараагийн ээлжид 3,4-р хорооллоос 100 айлын зам дагуу Цайз 16 хүртэлх авто зам, ХУД-ийн 120 буюу тэмээтэй хөшөөнөөс Нисэхийн тойрог хүртэл авто замын нэгдүгээр эгнээг чөлөөлж нийтийн тээврийн автобус саадгүй зорчих боломжтой эсэхийг судалж байна” гэв. 

Иргэдийн зүгээс “Нэгдүгээр эгнээг автобусанд бүрэн чөлөөлөх нь зөв шийдвэр. Энэ ажил үргэлжлээд бүх чиглэлд хэрэгжвэл хүмүүс автомашин унахаас илүүтэй нийтийн тээврээр зорчихыг сонгоно” гэж үзэж байгаа аж.

Гэвч зарим автобус чиглэлээ тодорхой зарлахгүй явдаг нь ахмад настнууд, харааны бэрхшээлтэй иргэдэд хүндрэл учруулж байгааг ч иргэд хэлжээ.

Мөн Улаанбаатар хотын гол гудамж, замын 15 байршилд зорчих хэсгийн нэгдүгээр эгнээнд саад болж байгаа авто машинуудыг цэгцлэх ажил үргэлжилж байна. Энэ хүрээнд Нийтийн тээврийн бодлогын газраас 38 албан хаагч автобусны буудлуудад зөвшөөрөлгүй зогссон, түр зогссон тээврийн хэрэгслийн хөдөлгөөнд зохицуулалт хийж ажиллаж байна.