Ерөнхий сайд Г.Занданшатар өнөөдөр (2026.03.01) эрчим хүчний салбарын өнөөгийн нөхцөл байдал, тулгамдсан асуудлын талаар холбогдох албаныхантай уулзаж, үүрэг өгөв. 

“Дулааны тавдугаар цахилгаан станц” төслийн газар шорооны ажлыг өнгөрсөн долоо хоногт эхлүүлж, өрөмдлөг хийж эхэлжээ. 

Төлөвлөгөөний дагуу ирэх сарын нэгэнд станцын барилгын ажлыг эхлүүлнэ гэв. Мөн Баянгийн 660 мВт-ын цахилгаан станцын бүтээн байгуулалтын явц, Улаанбаатар цахилгаан түгээх сүлжээний өргөтгөлийг холбогдох мэргэжлийн байгууллагуудын төлөөлөл танилцуулав. 

Ерөнхий сайд Эрчим хүчний салбарын найдвартай, тогтвортой ажиллагааг хангах чиглэлээр дунд хугацаанд хэрэгжүүлэх арга хэмжээний талаар тогтоолын төсөл боловсруулж Засгийн газрын хуралдаанд энэ сардаа багтааж танилцуулахыг Тэргүүн шадар сайд бөгөөд Эдийн засаг, хөгжлийн сайд Ж.Энхбаяр, Эрчим хүчний сайд Б.Чойжилсүрэн, Сангийн сайд Б.Жавхлан нарт чиглэл болголоо.