Ерөнхий сайдыг огцруулсан үйл ажиллагаа нь Үндсэн хуульд нийцсэн эсэх маргааныг шийдвэрлэх Үндсэн хуулийн цэцийн их суудлын хуралдаан өнөөдөр  эхэллээ. УИХ-ын гишүүн Н.Номтойбаяр УИХ-ыг төлөөлж уг хуралд оролцож буй бөгөөд түүнээс сэтгүүлчид зарим зүйлийг тодрууллаа.

Н.Номтойбаяр, Үндсэн хуудийн Цэцийн их суудлын хуралдаанд анхнаасаа хууль зөрчсөн асуудал гарч байна. Цэцийн бүрэлдэхүүнд ашиг сонирхлын зөрчилтэй гишүүд байна. Түүний нэг нь О.Мөнхсайхан. Занданшатарыг УИХ-ын дарга байхад өндөр дүнтэй хөлсөөр ажиллаж байсан хүнийг ашиг сонирхол нэгтэй гэж үзэж байна. Тиймээс бид О.Мөнхсайхан гишүүнээс татгалзах саналаа хүргүүллээ.

Их хурлаас Цэцийн хуралдаанд итгэмжлэгдсэн төлөөлөгчөөр П.Сайнзоригийг томилсон. Гэвч П.Сайнзоригийг итгэмжлэгдсэн төлөөлөгчөөр хүлээн зөвшөөрөхгүй, Гэрч гэж Цэцийн дарга Баясгалан зарлалаа. Энэ хуралдаанаас хууль ёсны шийдвэр гарна гэж итгэхгүй байна. Энэ бол улс төрийн захиалгатай хурал. Ингэж захиалгаар улс төрийн шийдвэр гаргаснаар үр дагавар нь юу болохыг бодох ёстой гэв. 

Хуралдаанд даргалагч Г.Баясгалан, Хуралдаанаас Цэцийн гишүүн О.Мөнхсайханаас татгалзах саналыг үндэслэлгүй гэж үзсэнээ танилцуулав.


Хуралдаанд хүсэлт гаргагч буюу Засгийн газрын итгэмжлэгдсэн төлөөлөгчөөр: 

ЗГХЭГ-ын дарга С.Бямбацогт
Тэргүүн дэд дарга Д.Мөнх-Эрдэнэ
Дэд дарга Д.Цолмон
ЗГХЭГ-ын хууль эрх зүйн газрын референт Б.Төрбат нар оролцож байна. 

УИХ-ын итгэмжлэгдсэн төлөөлөгчөөр, УИХ-ын дэд дарга Х.Булгантуяа, УИХ-ын гишүүн Н.Номтойбаяр, Х.Баасанжаргал нарын 18 гишүүн оролцож байна. 



УИХ-ын гишүүн Х.Баасанжаргал, УИХ-ын гишүүн П.Сайнзориг, Ц.Сандаг-Очир нарыг итгэмжлэгдсэн төлөөлөгчөөр томилсныг хуралдаан даргалагч, Үндсэн хуулийн цэцийн дарга Г.Баясгалан гэрчээр томилсныг УИХ-ын итгэмжлэгдсэн төлөөлөгчөөр томилогдсон гишүүд эсэргүүцэж байна. 

Мөн Ц.Идэрбат, Б.Баярбаатар, Э.Болормаа, Л.Энхнасан, Ц.Даваасүрэн, Г.Тэмүүлэн нарын гишүүнийг УИХ-ын итгэмжлэгдсэн төлөөлөгчөөр томилогдон ирснийг хуралдаанд албан ёсоор танилцуулахыг хүсэв. 

Ерөнхий сайдын итгэмжлэгдсэн төлөөлөгч С.Бямбацогт, Хуралдаанд нэмэлт нотлох баримт өгөхийг хүсэж буйгаа илэрхийлээд, УИХ-ын 18 гишүүн итгэмжлэгдсэн  төлөөлөгчөөр оролцож байна. УИХ-ыг төлөөлсөн гишүүд Цэцийн хуралдаанд хүч түрсэн байдлаар оролцож байна. Дэгээ сахиж хуралдаанд оролцохыг хүсэж байна гэв.

УИХ-ын итгэмжлэгдсэн төлөөлөгч, УИХ-ын гишүүн Г.Тэмүүлэн, Хуралдааныг хойшлуулах хүсэлтэй байна. Хууль зөрчиж, үндэслэлгүйгээр хуралдааны тов тогтоосон нь Үндсэн хуулийн цэцэд маргаан хянан шийдвэрлэх тухай хуулийг зөрчиж байна. Цэцээс маргалдагч талуудын эрх үүргийг тэгш хангаж ажиллахыг хүсэж байна. Хуралдаанд бэлтгэх хуулийн хугацааг зөрчиж, хуралдааны товыг зарласан нь оролцогч талуудын эрхийг зөрчиж байна. Энэ хүсэлтийг би болон Номтойбаяр гишүүн гаргаж байна гэлээ.