“ЛэндМН ББСБ” ХК нь 2024 оны Хувьцаа эзэмшигчдийн ээлжит хурлаа 2025 оны 03 дугаар сарын 29-ний өдөр Галлериа Улаанбаатар төв (Galleria Ulaanbaatar Center)-ийн 3 давхарт байрлах Juulchin Grand Ballroom танхимд зохион байгууллаа. 2024 оны хамгийн өсөлттэй хувьцаат компаниудын нэг болох “ЛэндМН ББСБ” ХК-ийн гэрээт харилцагчдын тоо өмнөх жилээс 9%, цэвэр ашиг 82%, татан төвлөрүүлсэн эх үүсвэр 84%, зээлийн багц 90%-аар тус тус өссөн үзүүлэлттэй байна.

Хуралд нийт саналын эрхтэй хувьцаа эзэмшигчдийн 81.64% нь оролцож, дараах 6 асуудлыг хэлэлцэж, шийдвэрлэсэн байна. Үүнд:  

• 2024 оны үйл ажиллагааны болон санхүүгийн аудитлагдсан тайланг танилцуулах;
• 2024 оны үйл ажиллагааны болон санхүүгийн тайлангийн талаарх Төлөөлөн удирдах зөвлөлийн дүгнэлтийг хэлэлцэн батлах;
• ТУЗ-ийн 2024 оны үйл ажиллагааны тайланг танилцуулах;
• Компанийн ТУЗ-ийн гишүүдийг улируулан сонгох;
• ТУЗ-ийн 2025 оны төсвийг батлах;
• Компанийн дүрэмд нэмэлт, өөрчлөлт оруулах.

“ЛэндМН ББСБ” ХК-ийн ТУЗ-өөс нэгж хувьцаанд 15 (арван таван) төгрөгийн ногдол ашиг олгохоор шийдвэрлэж, 2024 оны цэвэр ашгийн 30.62 (гуч зууны жаран хоёр) хувийг буюу 11,089,525,245 (арван нэгэн тэрбум наян есөн сая таван зуун хорин таван мянга хоёр зуун дөчин тав) төгрөгийг хувьцаа эзэмшигчдэдээ мөнгөн хэлбэрээр 2025 оны 04 дүгээр сарын 04-ний өдөр “Үнэт Цаасны Төвлөрсөн Хадгаламжийн Төв” ХХК-аар дамжуулан хувьцаа эзэмшигчдийнхээ дансанд байршуулахаа дахин мэдэгдлээ.

Хувьцаа эзэмшигчдийн ээлжит хурлаа амжилттай зохион байгуулсан “ЛэндМН ББСБ” ХК нь 2024 онд бичил, жижиг, дунд бизнес эрхлэгчдэд зориулсан барьцаагүй, 100% дижитал бизнесийн бүтээгдэхүүнийг амжилттай нэвтрүүлж, олон мянган бизнес эрхлэгчдийг цаг хугацаа, хөрөнгө, бичиг баримтын ачааллаас чөлөөлсөн санхүүгийн салбар дахь шинэ үеийг эхлүүлжээ. 

Энэхүү дижитал бизнесийн бүтээгдэхүүн нь нийгэмд үнэ цэнтэй, шинэлэг шийдэл болсон гэдгийг олон улсын түвшинд ч хүлээн зөвшөөрсөн юм. Тодруулбал, “Сингапурын Төв Банк” болон “Сингапурын Финтек Холбоо”-оос зохион байгуулдаг “Fintech Excellence Awards”-ийн “Financial Inclusivity” төрөлд эцсийн шатанд шалгарч, Зүүн Өмнөд Ази болон олон улсын хэмжээнд жижиг, дунд бизнесийн санхүүгийн хүртээмжийг нэмэгдүүлэхэд бодит хувь нэмэр оруулсан гэж үнэлэгджээ.

“ЛэндМН ББСБ” ХК нь 2025 онд эдийн засгийн өсөлтийг хурдасгах, бизнес эрхлэлтийг дэмжих, санхүүгийн хүртээмжийг нэмэгдүүлэхэд манлайлан оролцох зорилгоо үргэлжлүүлэн ажиллахаа мэдэгдээд байна.