Их Британийн Ерөнхий сайд Кир Стармер ням гарагт Европын удирдагчид Украины энх тайвны төлөвлөгөөг боловсруулж, АНУ-д танилцуулахаар тохиролцсон гэж мэдэгдэв.

Тодруулбал ням гарагт Лондон хотод Европын 18 улсын удирдагч, засгийн тэргүүнүүд чуулсан. Энд Украины ерөнхийлөгч Володимир Зеленський мөн оролцсон. Тэрбээр хоёр хоногийн өмнө Вашингтон дахь айлчлалынхаа үеэр ерөнхийлөгч Трамптай ширүүхэн зөрчилдсөн юм.

Харин Европын удирдагчид Зеленськийг дэмжиж, Украиныг хамгаалахад нэмэлт тусламж үзүүлэхээ амлаад байна. 

Стармер Зеленськийг халуун дотноор тэврэн угтан авсан ба Трампад танилцуулах төлөвлөгөөнд

• Украины цэргийн тусламжийг үргэлжлүүлж, Оросын эсрэг эдийн засгийн шахалтыг нэмэгдүүлэх
• Украины аюулгүй байдлыг хангах, энх тайвны хэлэлцээрт Украины оролцоог зайлшгүй хангах
• Гэрээ байгуулсан тохиолдолд ирээдүйн түрэмгийллээс Украиныг хамгаалах
• Тогтвортой энх тайван тогтоохын тулд "бэлэн байдлын эвсэл" байгуулах зэрэг зүйлсийг багтаахаар ярилцсан аж.

Тэрбээр "Энэ бол зүгээр яриад өнгөрөх үе биш. Одоо үйлдэл хийх цаг. Бид шударга, тогтвортой энх тайвныг тогтоох шинэ төлөвлөгөө гарган удирдан чиглүүлэх ёстой" гэжээ.

Энэ төлөвлөгөөний талаар нарийн дэлгэрэнгүй мэдээлэл өгөөгүй ч Францын Ерөнхийлөгч Эммануэл Макрон уулзалтын өмнө өгсөн ярилцлагадаа нэг сарын хугацаатай гал зогсоох санал гаргах талаар дурдсан. 

Зеленський Украины аль ч газар нутгийг Орост өгөхгүй гэдгээ мэдэгдэж, АНУ-тай ашигт малтмалын гэрээ байгуулахад бэлэн хэвээрээ байгаагаа илэрхийлсэн байна. Тэрбээр Цагаан ордонд болсон сөргөлдөөний дараа Трамптай харилцаагаа сайжруулж чадна гэсэн ч үүнийг хаалттай хийх шаардлагатай гэсэн байна. 

Эх сурвалж: Reuters