ЗГХЭГ-ын дарга Н.Учрал өнгөрсөн бямба гарагт санхүү, хууль хяналтынхан болон харилцаа холбооны салбарын удирдлагуудтай уулзаж, цахим мөрийтэй тоглоомтой холбоотой хууль бус ажиллагаатай тэмцэх, таслан зогсоох талаар үүрэг өглөө. Манай урлаг соёл, спортынхон болон нөлөөлөгчдөөр дамжуулан 1xВet-ээс 1 сая ам.долларын сурталчилгаа хийж, үр дүнд нь 500 сая ам.долларыг ОХУ руу урсгасан гэж мэдээллийг холбогдох байгууллагаас гаргасан байна.

Н.Учрал, Монгол Улсад сүүлийн жилүүдэд цахим мөрийтэй тоглоом газар авч байна. Ах, дүү амраг садан, найз нөхөд нь 1хBet-ийн хохирогч болоогүй хүн ховор байна. 1 сая ам.доллар оруулаад, 500 сая ам.доллар гаргаж байна гэдэг юу гэсэн үг вэ. Улс орны эдийн засагт ч сөрөг нөлөөтэй энэ цахим мөрийтэй тоглоом нь хяналтгүй мөнгө угаах механизм боллоо. Дэлхий дахинд үүсээд буй понзи схем шиг схемийн хохирогчид нь Монгол Улсын иргэд болж байна.

Олон сайхан залуус цахим мөрийтэй тоглоомд орсноос орон байраа алдаж, өр зээлд баригдаж, босгосон амьдралаа сүйрүүлж, эцэг эх, ханилсан хань, үр хүүхдээ зовоож байна. Энэ нь үндэсний аюулгүй байдлын хэмжээний асуудал боллоо. Тиймээс Ерөнхий сайдын захирамжаар Ажлын хэсэг байгуулж, шаардлагатай арга хэмжээг авч хэрэгжүүлэхээр ажиллаж эхэллээ. Ажлын хэсэгт хууль хяналт, банк санхүүгийн салбарынхан болон холбогдох бүх салбарынхныг оруулсан.

Н.Учрал: Монгол Улсад сүүлийн жилүүдэд цахим мөрийтэй тоглоом газар авч байна. Ах, дүү амраг садан, найз нөхөд нь 1хBet-ийн хохирогч болоогүй хүн ховор байна

Татварын байгууллага болон Монголбанкны мэдээлэлд гарсанчлан энэ шугамаар гадагшаа урсгаж байгаа валютын дүнг нэгтгэж, гүйлгээг царцаах хэрэгтэй.

ХХЗХ-ноос өнгөрсөн хугацаанд 25 домэйн хаяг хаасан. Тэгээд нэмэргүй нэрээ өөрчилж, зүсээ хувиргаад ажиллаад байдаг. Тэгэхээр цагдаа, тагнуулын байгууллагаас мэдээлэл авч, цаг алдахгүй өнөөдрөөс /2025.02.22/ эхлэн цахим мөрийтэй тоглоом сурталчилсан хаяг болон бүх холбоосуудыг хаах хэрэгтэй.

Энэ төрлийн сурталчилгаа хийсэн 7000 гаруй сүбьектүүдэд Монополийн эсрэг газраас торгууль тавих хэрэгтэй. Торгуулиа төлөхгүй бол хууль хяналтын дараагийн шатны байгууллагууд шилжүүлж хариуцлага тооцох хэрэгтэй. Нэг агент сар болгон 10 тэрбум төгрөг эргэлдүүлж байж яагаад 500 мянган төгрөгөөр торгуулж байдаг юм. Хуулийн санкцуудаа нэмэгдүүлж, хариуцлагыг чангатгах хэрэгтэй.  ХХЗХ цахим мөрийтэй тоглоом сурталчилж, холбон зуучилж байгаа 500 гаруй групп, пэйжүүдийн хаягийг жагсаагаад, Мета руу захидал илгээ гэв.