Кофе уудаг хүн бүхэн анхаараарай. Өглөө нэг аяга кофе уух нь эрт нас барах эрсдлийг бууруулдаг болохыг АНУ-ын Тулане их сургуулийн Таргалалтын судалгааны төвийн судлаачид нотолжээ.

Тодруулбал, өглөө кофе уудаг хүмүүс зүрх судасны өвчнөөр нас барах эрсдэл буурдаг. Мөн өдрийн турш кофе хэрэглэдэг хүмүүстэй харьцуулахад нас барах эрсдэл бага байсан гэж дурджээ. Гэвч кофе нь цорын ганц үхлийн шалтгаан мөн эсэхийг нотолж чадаагүй байна.

Тулане Их Сургуулийн Таргалалтын судалгааны төвийн ахлах судлаач, доктор Лу Ци хэлэхдээ, "Энэ судалгаагаар өглөө кофе уух нь зүрх судасны өвчнөөр нас барах эрсдэлийг яагаад бууруулдаг болох буюу эмнэлзүйн талаас нотолж чадаагүй ч өдөр, оройн цагаар уух нь хүний биед сөргө нөлөө үзүүлж байгааг уг судалгаа харуулж чадсан” гэжээ.  

Үдээс хойш эсвэл оройд кофе уух нь мелатонин зэрэг бидний хэвийн байх ёстой даавруудыг тэнцвэргүй болгож байгаа аж. Энэ нь эргээд үрэвсэл, цусны даралт зэрэг зүрх судасны өвчний суурь тавигддаг байна.

Судалгаанд хамрагдсан хүмүүсийн 36 хувь нь өглөө кофе уудаг хүмүүс, 14 хувь нь өдрийн турш уудаг хүмүүс байжээ.  

Ийнхүү эрдэмтэд өглөө кофе уудаг хүмүүс зүрхний өвчнөөр нас барах нь 31 хувиар бага байгааг тогтоожээ. 

-ЯАГААД ӨГЛӨӨНИЙ ЦАГ ЧУХАЛ ВЭ?

Өглөө сэрээд орноосоо босох үед бидний биеийн симпатик /мэдрэлийн систем/ идэвхжил мэдэгдэхүйц нэмэгддэг бөгөөд өдрийн цагт аажмаар алга болж, унтах үед хамгийн доод түвшинд очиж, амрах цагийг илтгэдэг. Тиймээс өдөр, оройн цагаар кофе ууж энэ хэмнэлээ алдагдуулснаар өвчлөх магадлал ихэсдэг байна. 

Эх сурвалж: BBC