Гадаад харилцааны яамнаас 2024 онд Монгол Улсын гадаад бодлогод ямар ахиц гарсан болон хэрэгжүүлсэн айлчлалуудын үр дүн, консулын үйл ажиллагааны талаар мэдээлэл хийлээ.
Өнгөрч буй онд тус яам Монгол Улсын гадаад харилцааны агуулга, ач холбогдол хийгээд дээд, өндөр түвшний айлчлал, олон улсын арга хэмжээний цар хүрээг тэлж, олон улсад Монгол Улсынхаа нөлөөг нэмэгдүүлэх, эдийн засгийг хөгжүүлэх таатай орчин бүрдүүлэхэд бодлого, үйл ажиллагаагаа чиглүүлдэг.
2024 онд:

• Ерөнхийлөгчийн түвшинд -15
• УИХ-ын даргын түвшинд- 3
• Ерөнхий сайдын түвшинд- 8
• Гадаад харилцааны сайдын түвшинд -8 айлчлал хэрэгжжээ.

Харин Монголд:

• ОХУ-ын Ерөнхийлөгч В.В.Путин
• БНХАУ-ын Дэд дарга Хань Жөн
• АНУ-тай стратегийн гуравдагч хөршийн түншлэлийн хүрээнд Гадаад хэргийн сайд нар харилцан айлчилж, ХБНГУ, Казахстан улсын Ерөнхийлөгч нарын Монголд хийсэн айлчлалын дүнгээр Стратегийн түншлэлийн харилцаа тогтоож, Вьетнам улстай Иж бүрэн түншлэлийн харилцаа тогтоох зэргээр хоёр хөрш болон гурав дахь хөршүүд рүү чиглэсэн айлчлалын тэнцвэрийг хангаж ажилласан гэж ГХЯ-ны хэвлэлийн төлөөлөгч Р.Нямдаваа мэдээлэв. 

Монгол Улсын Ерөнхийлөгчийн ивээл дор "Дэлхийн эмэгтэйчүүдийн чуулга уулзалт"-ыг НҮБ-тай хамтран Улаанбаатар хотноо зохион байгуулж, "Тогтвортой хөгжлийн төлөөх Улаанбаатар тунхаглал"-ыг гаргасан. Чуулга уулзалтад 19 улсын төр, засгийн тэргүүн, парламентын дэд дарга, сайд нар 10 гаруй олон улсын байгууллага, гадаад дотоодын 800 гаруй эмэгтэй манлайлагчид оролцжээ. 

Улирч буй онд Монгол Улсын 44607 иргэн консулын үйлчилгээ авчээ. Өнөөдрийн байдлаар /2024.12.27/ дэлхийн 90 гаруй оронд Монгол Улсын 210 мянга гаруй иргэн оршин сууж байна. ГХЯ-наас хилийн чанадад суугаа 50 дипломат төлөөлөгчийн газраар дамжуулан гадаадад зорчиж буй болон оршин сууж буй иргэддээ мэдээлэл, зөвлөмж хүргэх, төрийн үйлчилгээ үзүүлэх, эрх ашиг нь хөндөгдсөн тохиолдолд дэмжлэг, туслалцаа үзүүлжээ. Тус яамны иргэдэд туслах сангаас холбогдох хууль, тогтоомжийн дагуу 2024 онд 221 сая төгрөгийн дэмжлэг үзүүлсэн байна. 

Өнөөдрийн байдлаар Монгол Улсын бүх төрлийн паспорттой иргэд 30 улсад, дипломат, албан паспорттой иргэд 65 улсад визгүй зорчиж байна. ГХА-наас 2024 онд бүх төрлийн паспорттой иргэдийг визийн шаардлагаас харилцан чөлөөлөх тухай хэлэлцээрийг Вьетнам, Мальдив, Парагвай улстай байгуулжээ. Харин бүх төрлийн паспорттой гадаадын 66, дипломат, албан паспорттой гадаадын 38 улсын иргэд манай улсад визгүй зорчиж байна.