Өдгөө манай улсын хөдөлмөрийн зах зээлд гагнуурчин, оёдолчин, барилгачин, засал чимэглэлчин, мужаан гээд гарын ур дүй шаардсан мэргэжилтнүүдийн эрэлт хэрэгцээ өндөр байна.

Эдгээр мэргэжилтнүүдийг бэлтгэхэд үнэтэй хувь нэмэр оруулж буй сургуулиудын нэг нь Монгол Солонгосын техникийн коллеж юм. Тус сургуулийн энэ хичээлийн жилийн өвлийн төгсөлт саяхан боллоо.

МСТК-ийнхон мэргэжлийн боловсрол олгох сургалтын 13 мэргэжлээр 17 ангийн 426 мэргэжилтнийг төгсгөж, хөдөлмөрийн зах зээлийн ажиллах хүчнийг зузаатгаад байна.

Шинэ төгсөгчид Авто машины засварчин, гагнуурчин, арьс, үслэг эдлэлийн бүтээгдэхүүн үйлдвэрлэл, нар салхины үүсгүүртэй тоног төхөөрөмжийн угсрагч-засварчин, оёмол бүтээгдэхүүний оёдолчин, ноос, ноолуур боловсруулалтын технологийн ажилтан гэх мэт эрэлтэй тэргүүлэх мэргэжлүүдийг эзэмшжээ.

Эдгээр 426 мэргэжилтний  50,8 хувь нь хөдөө орон нутгийн төгсөгчид  бөгөөд бүс нутагтаа эрэлтэй тэргүүлэх мэргэжлээр ажиллах боломж бүрдэж байна.

Монгол Солонгос Политехник коллеж нь 1966 онд хөнгөн үйлдвэрийн техник-мэргэжлийн сургууль нэртэйгээр байгуулагдсанаас хойш 59 дэх хичээлийн жилдээ үйл ажиллагаагаа явуулж, 30000 гаруй мэргэжилтэй ажилтан, тусгай дунд боловсролтой мэргэжилтэн бэлтгэжээ.

Тус сургууль нийгмийн түншлэл, гадаад харилцааны хүрээнд БНСУ-ын дөрвөн их, дээд сургууль, БНХАУ-ын нэг сургууль, дотоодын 120 гаруй үйлдвэр аж, ахуйн нэгжтэй хамтарч суралцагчдаа дадлагажуулж ажлын байранд зуучилдаг байна. Гадаад түншлэл хамтын ажиллагааны хүрээнд мэргэжлийн багш нарыг гадаадад сургаж чадавхижуулах, шинэ техник технологи инновацыг сургалтад нэвтрүүлэхэд илүүтэй анхаарч ажилладгаараа давуу талтай юм.