АНУ-ын Төрийн нарийн бичгийн дарга Энтони Блинкен БНХАУ-д төрийн айлчлал хийж Хятадын дарга Ши Жиньпин тэргүүтэй эрх баригчидтай уулзав. Энэ үеэр тэрбээр дайны үеэр Хятад улс Орост тусламж үзүүлсээр байвал Вашингтоноос зохих арга хэмжээ авна гэдгээ мэдэгджээ.

Тодруулбал Блинкен ВВС-д өгсөн ярилцлагадаа “Хүйтэн дайнаас хойш Европ тивд хамгийн том аюул заналхийлэхэд Хятад улс тусалж байна гэдгийг эрх баригчдад нь тодорхой хэлсэн” гэв.

Гэхдээ ямар арга хэмжээ авах талаараа дэлгэрэнгүй мэдээлэл өгөөгүй байна. Түүнчлэн уулзалтын үеэр Блинкен Бээжингийн талаас фентанил эмийн нийлүүлэлтийг АНУ-д очихоос сэргийлж буйг нь сайшаав.

Мөн Ойрх Дорнодын асуудалд Хятад улс чухал үүрэг гүйцэтгэж чадна гэдгийг онцолжээ. Иран, Хятад хоёр хамтын ажиллагаатай байдаг тул Иран, Израил улсуудын сөргөлдөөнийг улам хурцатгахгүйн тулд Хятадыг уг харилцаагаа ашиглахыг уриалсан байна.

Сүүлийн үед АНУ, БНХАУ-ын харилцаа Тайванийн асуудал, өнгөрсөн оны хоёрдугаар сард тагнуулын бөмбөлөг хөөргөсөн зэрэг асуудлаас үүдэн муудаад байв. Түүнчлэн саяхан АНУ Хятадын эзэмшилд байдаг ТикТок платформыг АНУ-д зарах эсвэл улс даяар хориглох тухай хууль баталсан юм.

АНУ-ын Төрийн нарийн бичгийн дарга Энтони Блинкений 10 сарын дараа хийж буй уг айлчлал талуудын харилцаанд ахиц дэвшил гаргах нэг оролдлого гэдгийг ВВС онцлов.

БНХАУ-ын дарга Ши Жиньпин Блинкений уг айлчлалын үр дүнд өнгөрсөн оны арваннэгдүгээр сард АНУ-ын Ерөнхийлөгч Жо Байдентай уулзсанаас хойш тодорхой ахиц дэвшил гарсан гэдгийг хэлжээ. Мөн талууд “дайснууд биш хамтрагчид” байх хэрэгтэйг онцлоод “АНУ Хятадын хөгжилд эергээр хандвал харилцаа тогтворжиж, урагшлах боломжтой” гэсэн байна.

Харин Блинкений хэлснээр БНХАУ АНУ, Европын хооронд сайн харилцааг бий болгох гол алхам нь Хятад улс ОХУ-ыг илүү их зэвсэг үйлдвэрлэх боломжоор хангах чухал бүтээгдэхүүнүүдийг Орост нийлүүлэхээ болих гэв.

Эх сурвалж: ВВС