Малайзад зургаан настай хүү гурван настай дүүтэйгээ тоглоомон машин авахаар аав, ээжийнхээ машиныг жолоодож яваад осолджээ. Ослын улмаас азаар хэн нь ч хүнд бэртэл аваагүй байна.

Малайзын Лангкави аралд уг хэрэг болсон бөгөөд хүү жолоодлогоо алдаж, гэрлийн шон мөргөж зогссоны дараа цагдаагийнхан хэргийн газар очсон байна.

Хөвгүүд дэлгүүр орж тоглоомон машин худалдаж авахаар явж байжээ. Лангкави арлын цагдаагийн газрын дарга Шариман Ашари хүүхдүүдийн жолоодож явсан машин Тоёота Вайос загварын автомашин байсан бөгөөд хөдөлгөөнд оролцож байсан бусад жолооч нар согтуу жолоочтой машин явж байна гэж бодоод араас нь хөөсөн талаар мэдэгдсэн байна.

Хөвгүүд ээжийгээ угаалгын өрөөнд, аавыгаа унтаж байхад нь машиныг нь аваад гарчээ. Тэд шон мөргөхөөсөө өмнө 2.5 км зам туулсан байна.

Фэйсбүүкт хүүгийн 95 секундын бичлэг цацагдсан бөгөөд том хүү “Ээж гэртээ байгаа. Бид хоёр дэлгүүр явж байсан юм” гэхэд дүү нь “Бид хоёр хар машин авмаар байна” гэж ярьж буй нь сонсогдох аж. Ах нь эрүүгээ шалбалсан бол дүү нь гэмтэж бэртээгүй байна.

Эх сурвалж: CNN