ФОТО: Их хүрээний "Арван тавны цагдаа", БНМАУ-ын сэргийлэгчид жагсав

Монгол Улсад орчин цагийн цагдаагийн байгууллага үүсэж хөгжсөний 101, дотоодын цэргийн байгууллагын 100 жилийн ойн арга, хэмжээ Төв цэнгэлдэх хүрээлэнд боллоо.

Хүндэтгэлийн арга хэмжээг нээж ЦЕГ-ын дарга Дотоодын цэргийн командлагч, хошууч генерал Ж.Болд хэлсэн үгэндээ "Бид ард, иргэдийнхээ аюулгүй, амар амгалан байдлыг хангахын төлөө хүлээсэн үүрэг, хариуцлагаа гүн ухамсарлан бүхий л боломжоо дайчлан ажиллахаа илэрхийлье" гэв.

Ойд зориулсан ёслолын жагсаал боллоо. Жагсаалыг ЦЕГ-ын дэд бөгөөд Нийслэлийн цагдаагийн удирдах газрын дарга, Бригадын генерал Р.Отгонжаргал командлав. Мөн Их хүрээнд 19-р зууны дунд үеэр тусгай чиг үүрэг бүхий цагдаа хэмээх тушаалтан бий болсон. Улмаар хүрээний төв хэсгийн 15 га газарт хяналт тавьж үүрэг гүйцэтгэж байсан "15-ны цагдаа", БНМАУ-ын үеийн дүрэмт хувцастай сэргийлэгчдийн жагсаал боллоо.

Түүнчлэн цагдаа, дотоодын цэргийн сургалтын нэгдсэн төвийн албаны нохойн сургалтын хэлтсийн үзүүлэх тоглолт болсон юм.

Ташрамд мэдээлэхэд Монгол Улсад орчин цагийн цагдаагийн байгууллага үүсэж хөгжсөний 101, дотоодын цэргийн байгууллагын 100 жилийн ойг тохиолдуулан гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах, улсын онц чухал объектыг хамгаалах ажилд идэвх зүтгэл, үр бүтээл гарган ажилласан

274 алба хаагч, ажилтныг Монгол Улсын Ерөнхийлөгчийн зарлигаар Төрийн дээд одон, медалиар,
845 алба хаагч, ажилтан, ахмад ажилтнуудыг Хууль зүй, дотоод хэргийн яамны шагналаар,
836 алба хаагч, ахмад ажилтнуудыг Цагдаагийн ерөнхий газрын шагналаар буюу нийт 1955 алба хаагч, ажилтан, ахмад ажилтнуудыг шагнаж урамшуулжээ.

274 алба хаагч, ажилтныг Монгол Улсын Ерөнхийлөгчийн зарлигаар Төрийн дээд одон, медалиар,
845 алба хаагч, ажилтан, ахмад ажилтнуудыг Хууль зүй, дотоод хэргийн яамны шагналаар,
836 алба хаагч, ахмад ажилтнуудыг Цагдаагийн ерөнхий газрын шагналаар буюу нийт 1955 алба хаагч, ажилтан, ахмад ажилтнуудыг шагнаж урамшуулжээ.