АНУ-аас Монгол Улсад суугаа Элчин сайд Ричард Буанган монголчуудад Шинэ оны мэндчилгээ дэвшүүлснийг хүргэж байна.
 
Тэрбээр “Сайн байцгаана уу?

АНУ-аас Монгол Улсад суухаар шинээр томилогдон ирсэн Элчин сайд намайг халуун дотноор угтан авсан та бүхэнд их  баярлалаа. Өнгөрсөн хэдхэн долоо хоногийн хугацаанд би Монголын янз бүрийн салбарын олон хүнтэй уулзан танилцаж, танай орны бахархалт түүх, баялаг соёл уламжлалын талаар их зүйл сурч мэдлээ.

2023 оныг төсөөлөн харвал Монгол Улс Азийн бусад ардчилсан орнуудын дунд онцгой байр суурь эзэлсэн хэвээр байна гэсэн өөдрөг бодолтой байна. Ирэх онд та бүхний шаргуу хөдөлмөр, шинэчлэл, инновацийн үр дүнд Монголын эдийн засаг улам олон талт, бат бэх болон өсөж хөгжинө хэмээн итгэж байна. Монгол Улсдаа төдийгүй бусад улс үндэстний хувьд ч хүний эрх, эрх чөлөө, эрхэм чанарыг дээдэлдэг орон хэвээр байна гэдэгт итгэж байна.  

Та бүхний эрч хүч, урам зориг, танайх шиг бат бэх ардчилсан орнуудын тулгуур суурь болсон үнэт зүйлс, институцүүддээ итгэх итгэлгүйгээр бидний түншлэлийн харилцаа амжилт олох боломжгүй. Танай гуравдагч хөрш, анд нөхрийн хувиар Америкийн Нэгдсэн Улс та бүхэнтэй хамт байгаагаараа бахархдаг.    

2023 он та болон танай гэр бүл, АНУ-Монгол Улсын хувьд эрүүл энх, хөгжил цэцэглэлтийн жил байхын ерөөл дэвшүүлье.

Шинэ оны мэнд хүргэе!” гэсэн юм.