“Баруун хойно байрлах сондгой суваргыг нар буруу гурав тойроорой” гэх тайлбарлагчийн үг чихэнд содон сонсогдов. Суваргыг яагаад нар буруу тойрч байгаа юм бол гэсэн асуултын хариулт нь нүглээ ариусгахыг хүсэн залбирдаг тул нар буруу тойрдог гэх.

Энэхүү суваргыг Нархажодын цагаан суварга гэдэг бөгөөд хүний биеэр, сэтгэлээр, хэлээр үйлдсэн нүглийг суваргыг нар буруу гурав тойрохдоо ариусгаж хайрлахыг залбирдаг байна.

Нархажод хэмээх суварга бүхий, хавтгай хадыг давхарлаад тавьсан мэт сонин тогтоц дунд, Үлэмжийн чанарыг дуулан Дара эхийн тарни 1000 удаа, Хийморийн сан 100 удаа уншигдсантай тэнцэхүйц цаглашгүй их буяныг өөртөө хураадаг хэмээн алдаршсан энэ газрыг Дэмчогийн хийд гэнэ.

Дэлхийн энергийн төв гэгдэх энэ хийд Өмнөговь аймгийн нутаг Ханбогд уулнаас зүүн хойш 14км зайтай бөгөөд уул ба хийд хоёрын хооронд энергийн урсгал нэвт урсдаг хэмээдэг.

Дэмчог гэдэг нь “дээд амгалан” хэмээх утгатай ба Дэмчогийн хийд нь зөвхөн эргэл мөргөл, ариусал бясалгалын чиглэлээр байгуулагдаж, дүйцэн өдрүүдэд “дэмчог хурал”, хаврын тэргүүн сарын шинийн 15, 25-нд “ханжид дэмчог” хэмээх хурал хурдаг хийд байсан ба Ноён хутагт Данзанравжаа Дэмчогийн хийдэд намаржиж, Цагаан толгойн хийдэд зусаж, Эрээтийн хийдэд улааны урсгалын ном судар судалж, сургаал номоо айлддаг байсан гэдэг.