Жүдо бөхийн өсвөрийн дэлхийн аварга шалгаруулах тэмцээн Босни, Херцеговин улсын нийслэл Сараево хотод болж ганцаарчилсан барилдаанууд өндөрлөлөө.

60 орны 483 (271 эрэгтэй, 212 эмэгтэй) тамирчин оролцсон тэмцээнд Францын шигшээ баг 3 алт, 2 мөнгө, 1 хүрэл медальтай тэргүүлсэн бол 2 алт, 1 мөнгөн медальтай Гүрж, 2 алттай Япон улсын шигшээ багууд удаалав.

Нийт 16 жингийн барилдаанд 12 өөр улсын жүдочид түрүүлсэн бөгөөд 25 улсын төлөөлөл медаль авлаа.

Дэлхийн аварга шалгаруулах тэмцээнд Монголын 16 (9 эрэгтэй, 7 эмэгтэй) тамирчин оролцсоноос 2 хүрэл медаль хүртэж, 5 болон 7-р байрын шагналыг тус бүр нэг удаа авлаа.

Дээрх шагналт дөрвөн байрыг зөвхөн эмэгтэй ангиллын тамирчид авсан бол эрэгтэй төрөлд өрсөлдсөн тамирчид шагналт байрт шалгарч чадсангүй.