Ардчилсан намын Хэрэг эрхлэх газрын дарга Н.Лхагвадорж хэвлэлийн хурал зарлан 18:00 цагаас сонгуулийн зөрчилтэй холбоотой мэдээллийг баримттай харуулна хэмээн мэдэгдсэн. Энэ талаар мэдээлж байна.

АН-ын Хэрэг эрхлэх газрын дарга Н.Лхагвадорж:

-Тохиосон, үйлдэл дээрээ баригдсан зүйлсийн талаар бид ярьж байна. АН аль намын гишүүн гэдгээр талцуулж хагаралдуулахыг хүсээгүй. Гэтэл эрх баригч нам эв нэгдлийн эсрэг үйлдэл гаргаж буй тул энэхүү шийдвэрүүдийг танилцуулж байна.

Тухайлбал, түргэний автомашиныг ашиглан, тэр машины чанга яригчаар УИХ-ын гишүүн Чойжилсүрэн, Баярсайхан тэргүүтэй хүмүүс очиход албан ёсоор зар хүргэж, түгээж явсан. Бид энэ мэдээллийг цагдаагийн байгууллагад хүргүүлснээр 20 сая төгрөгөөр торгох шийдвэр гарсан.

Бас нэг ноцтой асуудал нь Монгол Улсын мөнгөн дэвсгэртийг хуурамчаар хэвлэн тараасан байж болзошгүй үйлдэл гарлаа.  БЗД дүүргийн 8 дугаар тойргийн санал хураах байранд сонгогчид яг саналын хуудсаа уншуулах төхөөрөмжийн дээр камер байршуулсан байна. Ингэж бусдыг хэнд хэрхэн санал өгч буйг хууль бусаар мэдэж авч байгаа үйлдэл гарсан. Ингээд нийт 22 ноцтой зөрчил, үйлдэл илэрлээ.

Эрх баригчид төрийн эрхийг авахаар цагдаа, эмнэлэг, хуулийн гээд байж болох бүх салбарын хүмүүсийг оролцуулан санаархаж байна. Хамтдаа хууль бус зүйлийн эсрэг тэмцэн зогсохыг уриалъя.

Ардчилсан намын хуулийн зөвлөх:

• Төв аймагт буюу УИХ-ын тавдугаар тойрогт нэр дэвшигч Ч.Ундрамын сонгуулийн штабаас мөнгө тараасан байна. Дэмжигч, гишүүн гэх мэтээр гарын үсэг зурж, мөнгөө хүлээн авч гарын үсэг зурсан баримт бичиг нь бий.
• Ховд аймагт санал авч буй байранд цагдаагийн албан хаагчид хэт нэг талыг барин ажиллаж байна. Жишээ нь, Ардчилсан намын гишүүд, дэмжигчдэд хэт их шаардлага тавьж байна.
• Чингэлтэй дүүрэгт байрлах санал авах байрны удирдлага нь МАН-ыг дугуйлаарай гэдэг заавар, зөвлөгөө өгч буй зураг нь байна. Бүх саналын байранд ийм нийтлэг зөрчил бий.
• Баян-Өлгий аймагт санал өгч байгаа хэсэгт камер байрлуулж хэнд санал авсныг нь харж болохоор нөхцөл байдал үүсгэсэн байна. Энэ камер ажилладаггүй гэж хэлсэн, гэхдээ цагдаагийн байгууллага шалгаж байгаа. Энэ аймагт сонгогчид та энэ хүний нэрийг ингэж дугуйлна гэж зааж, зааварлах зөрчил хавтгайрсан.

Энэ мэт ноцтой 25 баримтыг танилцууллаа. Ийм байдлаар хууль бус, шударга бусаар сонгуулийн санал хураалтад нөлөөлж болохгүй.